Azərbaycan Respublikasının Baş prokuroru Kamran Əliyevin rəhbərlik etdiyi nümayəndə heyəti sentyabrın 24-də Özbəkistana rəsmi səfərə gedib.

Səfər çərçivəsində Özbəkistan Baş Prokurorluğunda ikitərəfli görüş keçirilib. Özbəkistanın Baş prokuroru Niqmatilla Yuldaşev qonaqları salamlayaraq iki ölkə arasında yüksələn xətlə inkişaf edən əməkdaşlıqdan məmnunluğunu ifadə edib. O, həm ikitərəfli, həm də beynəlxalq təşkilatlar çərçivəsində səmərəli əməkdaşlığın bundan sonra da davam etdiriləcəyinə əmin olduğunu bildirib.

Kamran Əliyev isə səmimi qəbula görə təşəkkürünü çatdıraraq, Heydər Əliyev tərəfindən əsasları qoyulmuş və Prezident İlham Əliyev tərəfindən uğurla davam etdirilən Azərbaycan–Özbəkistan münasibətlərinin siyasi, iqtisadi və mədəni sahələrdə yeni mərhələyə yüksəldiyini vurğulayıb. Baş prokuror xüsusilə Qarabağda həyata keçirilən bərpa-quruculuq işlərinə Özbəkistanın dəstəyini yüksək qiymətləndirib.

Görüş zamanı gələcək əməkdaşlıq istiqamətləri müzakirə olunub və tərəflər arasında “2026–2027-ci illər üçün Əməkdaşlıq Proqramı” imzalanıb. Proqram çərçivəsində birgə seminarlar, konfranslar, təcrübə mübadiləsi və prokurorluq orqanlarının fəaliyyətində rəqəmsallaşmaya dair tədbirlərin keçirilməsi nəzərdə tutulur.

Sentyabrın 25-də Kamran Əliyev Türk Dövlətləri Təşkilatına üzv ölkələrin Baş Prokurorları Şurasının 4-cü iclasında da iştirak edib. Çıxışında rəqəmsallaşma və elektron idarəetmənin Azərbaycanın dövlət siyasətində prioritet istiqamətlərdən biri olduğunu qeyd edən baş prokuror, bu sahədə prokurorluq orqanlarının təcrübəsini bölüşüb.

Azərbaycan nümayəndə heyətinin Özbəkistana səfəri davam edir.