Ermənistanın Baş naziri Nikol Paşinyan “Zəngəzur dəhlizi” ifadəsi ilə bağlı mövqeyini açıqlayıb. O, bu barədə parlamentdə Nazirlər Kabineti üzvləri ilə keçirilən sual-cavab sessiyasında danışıb.

Paşinyan bildirib ki, söhbət əslində Horadiz–Zəngilan yolundan gedir və bu yol Ermənistan sərhədinə qədər uzana bilər, lakin ölkənin ərazisinə daxil olmur:

“Azərbaycan “Zəngəzur dəhlizi” deyirsə, qoy desin. Mən tam əminliklə deyə bilərəm ki, Ermənistan ərazisində belə bir dəhliz yoxdur. Bunu təkcə öz imzamla yox, həm də Azərbaycan prezidenti İlham Əliyevin imzası ilə sübut edə bilərəm”, – deyə Paşinyan vurğulayıb.

O əlavə edib ki, yolun “Zəngəzura aparan marşrut” adlandırılması mümkündür, amma bunun Ermənistanın suverenliyi ilə heç bir bağlılığı yoxdur:

“Azərbaycan istəsə, ona “Albert Eynşteyn” də deyə bilər. Bu, bizim suverenliyimizə aid məsələ deyil”.

Paşinyan həmçinin qeyd edib ki, Ermənistan ərazisində həyata keçirilən layihələrin adını müəyyənləşdirmək üçün kimsədən icazə almağa ehtiyac yoxdur. Onun sözlərinə görə, hökumətin “Sülhün kəsişməsi” adlı layihəsi var və rəsmi adı TRIPP (Trump Route for International Peace and Prosperity) olaraq təqdim edilib.

Xatırladaq ki, avqustun 8-də Vaşinqtonda, ABŞ prezidenti Donald Trampın şahidliyi ilə Azərbaycan prezidenti İlham Əliyev və Ermənistan baş naziri Nikol Paşinyan arasında sülh bəyanatı imzalanıb. Həmçinin, Azərbaycan və Ermənistan xarici işlər nazirləri iki ölkə arasında sülh sazişinin mətnini paraflayıblar.