Birləşmiş Millətlər Təşkilatının (BMT) Təhlükəsizlik Şurası Suriya prezidenti Əhməd Əl-Şaaraya qarşı tətbiq edilən sanksiyaları rəsmi olaraq ləğv edib.

Qətnaməni Təhlükəsizlik Şurasının daimi üzvlərindən biri olan ABŞ irəli sürüb. Qərarın Əl-Şaaranın noyabrın 10-da Ağ Evə planlaşdırılan səfərindən əvvəl qəbul edilməsi diqqət çəkib.

BMT həmçinin Suriya daxili işlər naziri Anas Xattaba qarşı sanksiyaları da aradan qaldırıb.

Suriya Xarici İşlər Nazirliyi sanksiyaların ləğvini “diplomatik ədalətin bərpası” kimi qiymətləndirib və sosial media hesabında paylaşım edərək, ABŞ-yə və “dost ölkələrə” təşəkkürünü bildirib.

Qeyd edək ki, bu səfər Əhməd Əl-Şaaranın bu il ABŞ-yə ikinci səfəri olacaq. O, sentyabr ayında BMT Baş Assambleyasında çıxış edən son 60 ildə ilk Suriya lideri kimi Nyu-Yorkda iştirak etmişdi.

Əl-Şaara həmin çıxışında vurğulamışdı ki, “Suriya millətlər ailəsində öz layiqli yerini geri qaytarır.”

Əvvəllər “əl-Qaidə” ilə əlaqəli “Həyat Tahrir əl-Şam” (HTS) qrupunun rəhbəri kimi tanınan Əl-Şaara BMT-nin sanksiyaları altında idi. ABŞ iyul ayında HTS-i terror təşkilatları siyahısından çıxarıb.

Xatırladaq ki, Əhməd Əl-Şaara ötən ilin dekabrında 13 illik vətəndaş müharibəsini sona çatdıraraq Bəşər Əsədi devirmiş üsyançıların lideri kimi Suriya keçid hökumətinin prezidenti təyin olunub.

ABŞ prezidenti Donald Tramp və Əl-Şaara ilk dəfə may ayında Riyadda görüşüblər. Tramp həmin görüşdən sonra Əl-Şaaranı “çox sərt keçmişə malik, lakin praqmatik lider” adlandırmışdı.