Türkiyə Baş Prokurorluğu İstanbulun həbsdə olan meri, Cümhuriyyət Xalq Partiyasının (CHP) prezidentliyə namizədi Əkrəm İmamoğlu haqqında ittiham aktını məhkəməyə təqdim edib.

Noyabrın 11-də ictimaiyyətə açıqlanan və təxminən 4 min səhifədən ibarət olan sənədə əsasən, İmamoğlu 142 cinayət əməlində ittiham olunur və onun 2352 il müddətinə azadlıqdan məhrum edilməsi tələb edilir.

İttiham aktında ümumilikdə 402 nəfərin adı çəkilir. Onlardan 105 nəfər həbsdə, 170 nəfər məhkəmə nəzarəti altındadır, 7 nəfər isə axtarışdadır.

Prokurorluğun iddiasına görə, İmamoğlu İstanbul Böyükşəhər Bələdiyyəsinə rəhbərlik etdiyi dövrdə dövlətə 10 il ərzində təxminən 160 milyard lirə həcmində zərər vurub.

O, cinayətkar təşkilat yaratmaq, rüşvət almaq, qanunsuz gəlirləri leqallaşdırmaq, dələduzluq, ictimai mülkə və ətraf mühitə zərər vurmaq kimi maddələrlə ittiham olunur.

Əkrəm İmamoğlu bu ilin martın 18-də, universitet diplomunun ləğvindən bir gün sonra saxlanılıb və martın 23-də korrupsiya ittihamı ilə həbs edilib.

O, istintaq və məhkəmədə verdiyi ifadələrdə ittihamları qəti şəkildə rədd edib və bunu siyasi motivli kampaniya adlandırıb.

İmamoğlunun işi, İstanbul Böyükşəhər Bələdiyyəsinə qarşı aparılan araşdırmalar və CHP-nin prezidentliyə namizəd seçkiləri ərəfəsində gündəmə gəlib.

Əkrəm İmamoğlu 2019-cu ilin martından İstanbulun meri vəzifəsini icra edir və Türkiyə prezidenti Rəcəb Tayyib Ərdoğanın əsas siyasi rəqiblərindən biri hesab olunur.

Türkiyədə növbəti prezident seçkiləri 2028-ci ildə keçiriləcək.