Azərbaycan Respublikasının Prezidenti İlham Əliyev noyabrın 13-də ABŞ-ın İsa Məsihin Sonuncu Gün Müqəddəsləri Kilsəsinin nümayəndə heyətini qəbul edib.

Nümayəndə heyətinə “On İki Həvari Kvorumu”nun üzvü Deyvid Bednar, Yetmişlər Komitəsinin üzvü və Avropa Mərkəzi Ərazi İdarəsinin birinci məsləhətçisi Cek Gerard, Stirlinq Fondunun prezidenti və idarə heyətinin sədri Mayls Hansen, eləcə də Yetmişlər Komitəsinin Mərkəzi Avropa və Avrasiya üzrə kvorumunun üzvü Pol Pikard daxil olub.

Söhbət zamanı Prezident İlham Əliyevlə nümayəndə heyətinin əvvəlki görüşləri məmnunluqla xatırlanıb.

Qonaqlar ABŞ Prezidenti Donald Trampın şahidliyi ilə Azərbaycan və Ermənistan arasında sülh gündəliyinin irəli aparılması istiqamətində Vaşinqtonda əldə edilən razılaşmalar münasibətilə təbriklərini çatdırıblar.

Dövlət başçısı təbriklərə görə təşəkkür edərək, Vaşinqtonda əldə olunmuş razılaşmaların tarixi əhəmiyyət daşıdığını, regionun inkişafı üçün mühüm rol oynadığını bildirib. O, həmçinin Trampın yenidən prezident seçilməsindən sonra Azərbaycan-ABŞ münasibətlərinin yeni mərhələyə keçdiyini, bu ilin avqustunda Vaşinqtona səfəri çərçivəsində ikitərəfli əlaqələrin inkişafına dair mühüm sənədlərin imzalandığını xatırladıb.

Qonaqlar Azərbaycan hökumətinin İsa Məsihin Sonuncu Gün Müqəddəsləri Kilsəsini rəsmi qeydiyyata almasına görə minnətdarlıq ifadə edərək, kilsənin Bakı ofisinin açılışında iştirak edəcəklərini bildiriblər. Onlar bunu Azərbaycanda bütün dinlərin nümayəndələrinə göstərilən hörmət və qayğının təzahürü kimi qiymətləndiriblər.

Görüşdə ölkəmizdə mədəniyyətlərarası və dinlərarası dialoqun təşviqi sahəsində görülən işlər müzakirə olunub. Qeyd edilib ki, Azərbaycan bu istiqamətdə bir çox beynəlxalq tədbirlərə ev sahibliyi edib.

Prezident İlham Əliyev vurğulayıb ki, tolerantlıq xalqımızın həyat tərzidir, müxtəlif dinlərin və xalqların nümayəndələri tarixən Azərbaycanda bir ailə kimi dinc və sülh şəraitində yaşayıblar.