Gürcüstanın keçmiş prezidenti Mixail Saakaşvili hazırkı gürcü hakimiyyətinin həm Qərb tərəfdaşları, həm də region ölkələri ilə münasibətləri pisləşdirdiyini iddia edib. O, bu barədə “Facebook” səhifəsində yazıb.

Saakaşvilinin sözlərinə görə, hökumət Ermənistanla münasibətləri gərginləşdirməklə yanaşı, Azərbaycanla da problemlər yaradıb:

“Kobaxidze Ermənistandan gürcü QHT-lərini İrəvandan qovmağı və onların hesablarını bağlamağı xahiş edir. Paşinyan hökuməti cavab verir ki, Ermənistanda xarici agentlər haqqında qanun yoxdur və onların fəaliyyətini məhdudlaşdırmaq üçün heç bir əsas görmür.”

O, əlavə edib ki, Gürcüstan hakimiyyəti Azərbaycanla da münasibətlərdə gərginlik yaradıb:

“Bu arada Tbilisi artıq Azərbaycana yüklərin daşınması ilə bağlı problemlər yaradıb. Azərbaycan mediası bunda haqlı olaraq Rusiyanın təsirini görür.”

Saakaşvili Gürcüstanın regiondakı mövqeyinin zəiflədiyini və bunun ölkənin xarici siyasətində ciddi problemlər yaratdığını bildirib.