ABŞ-ın İranda baş verən etirazlara mümkün müdaxiləsi ilə bağlı qeyri-müəyyənlik davam edir. Vaşinqtonda hərbi müdaxilə variantları müzakirə olunsa da, rəsmi dairələr quru əməliyyatlarının istisna edildiyini bildirir. Bu fonda ekspertlər ABŞ-ın hərəkətsiz qalmasının ciddi nəticələr doğura biləcəyi barədə xəbərdarlıq edirlər.

İsraildə yaşayan hərbi ekspert, “Orda ilə müharibə” Telegram kanalının müəllifi Sergey Auslender RFI-nin rusdilli redaksiyasına müsahibəsində bildirib ki, ABŞ İrandakı etirazlara real dəstək verməsə, bu, etirazçılara qarşı açıq xəyanət kimi qiymətləndiriləcək.

Onun sözlərinə görə, ABŞ-ın müdaxiləsi məhdud xarakter daşıya bilər və kiberəməliyyatlar, hibrid müharibə elementləri, siyasi təzyiq və həmrəylik bəyanatları ilə məhdudlaşa bilər. Auslender Tramp administrasiyasının İranla biznes aparan ölkələrə rüsum tətbiq etməsini isə “palliativ tədbir” adlandırıb və bunun etirazçılara real kömək etməyəcəyini deyib.

Ekspertin fikrincə, daha radikal ssenari ABŞ-ın rejimin əsas simvollarına və qərar qəbul edən mərkəzlərə zərbələr endirməsi ola bilər. O, həmçinin İranın ali rəhbəri Əli Xameneyinin və İnqilab Keşikçiləri Korpusunun (SEPAH) yuxarı rəhbərliyinin neytrallaşdırılması cəhdlərinin mümkünlüyünü də istisna etməyib. Bu halda, keçid dövrü üçün hakimiyyətin Məsud Pezeşkianın rəhbərlik etdiyi mülki administrasiyaya ötürülməsi variantı gündəmə gələ bilər.

Auslender bildirib ki, ABŞ prezidenti Donald Trampın iranlıları etirazları davam etdirməyə çağırması və “yardım yoldadır” mesajı faktiki olaraq birbaşa hərəkət çağırışı kimi qəbul olunub. Əgər bu çağırışların arxasında real addımlar dayanmasa, etirazların qan içində boğulacağını deyən ekspert, ölkədə genişmiqyaslı repressiyaların başlaya biləcəyini vurğulayıb.

Onun fikrincə, belə bir ssenari İranın daha da qapanmasına və Şimali Koreya tipli sərt avtoritar modelə çevrilməsinə gətirib çıxara bilər. Ekspert qeyd edib ki, hazırkı mərhələdə hadisələrin inkişafı böyük ölçüdə ABŞ prezidentinin verəcəyi qərarlardan asılıdır.