Yanvarın 19-da Azərbaycan Respublikasının Prezidenti İlham Əliyev Davos Ümumdünya İqtisadi Forumu çərçivəsində Braziliyanın aparıcı investisiya banklarından və aktivlərin idarə edilməsi şirkətlərindən biri olan **“BTG Pactual”**ın sədri Andre Esteves ilə görüş keçirib.

Görüş zamanı Prezident İlham Əliyev Azərbaycanın makroiqtisadi sabitliyi, fiskal intizamı və uzunmüddətli inkişaf strategiyası barədə danışaraq, bu istiqamətdə həyata keçirilən siyasətin ölkənin beynəlxalq maliyyə bazarlarında etibarlı tərəfdaş kimi mövqeyini daha da möhkəmləndirdiyini bildirib. Dövlət başçısı vurğulayıb ki, beynəlxalq reytinq agentlikləri Azərbaycanın kredit reytinqini artıraraq, ölkəni investisiya səviyyəli və müsbət proqnozlu reytinq kateqoriyasına yüksəldiblər.

Andre Esteves rəhbərlik etdiyi şirkətin qlobal fəaliyyət coğrafiyası və institusional investorlarla iş təcrübəsi barədə məlumat verərək, **“BTG Pactual”**ın müxtəlif regionlarda tətbiq etdiyi investisiya yanaşmalarını diqqətə çatdırıb.

Görüşdə, həmçinin Azərbaycan Respublikası Dövlət Neft Fondu ilə “BTG Pactual” arasında son dövrlərdə mümkün əməkdaşlıq istiqamətləri və strateji prioritetlər ətrafında aparılan ilkin müzakirələrdən bəhs olunub, qarşılıqlı maraq doğuran sahələr üzrə dialoqun davam etdirildiyi qeyd edilib.

Söhbət zamanı qlobal iqtisadi proseslər, beynəlxalq maliyyə bazarlarında mövcud vəziyyət, institusional investorların müxtəlif regionlara yanaşması, inkişaf etməkdə olan bazarlarda investisiya mühiti və uzunmüddətli investisiya layihələri ilə bağlı fikir mübadiləsi aparılıb.

Qeyd edək ki, 1983-cü ildə təsis edilmiş “BTG Pactual” hazırda yarım trilyon ABŞ dollarından çox aktiv idarə edən aparıcı qlobal maliyyə institutlarından biridir.