Rusiya Prezidenti Vladimir Putin aparıcı beynəlxalq xəbər agentliklərinin rəhbərləri ilə görüşündə Azərbaycan-Rusiya münasibətlərini yüksək qiymətləndirib.

Putin bildirib ki, iki ölkə arasında əlaqələr həm siyasi, həm də iqtisadi sahələrdə ənənəvi olaraq yaxşı səviyyədə olub və bu xətt davam edir:

“Mən Rusiya ilə Azərbaycan arasındakı münasibətləri çox yaxşı hesab edirəm. Həm iqtisadi, həm də siyasi baxımdan Azərbaycanla həmişə yaxşı münasibətlərimiz olub”.

Rusiya lideri qeyd edib ki, bir neçə il əvvəl imzalanmış strateji əməkdaşlıq haqqında saziş ikitərəfli münasibətlərin inkişafına mühüm töhfə verir. Onun sözlərinə görə, Azərbaycan Prezidenti İlham Əliyev bu əməkdaşlığın möhkəmləndirilməsi istiqamətində fəal rol oynayır.

Putin həmçinin vurğulayıb ki, Rusiyadan Azərbaycan iqtisadiyyatına 10 milyard rubldan çox investisiya yatırılıb. O, humanitar sahədə əməkdaşlığın da geniş olduğunu, Rusiyada çoxlu sayda Azərbaycan vətəndaşının çalışdığını qeyd edib.

Rusiya Prezidenti əlavə edib ki, Moskva İrana humanitar yardımın çatdırılmasında göstərilən dəstəyə görə Prezident İlham Əliyevə minnətdardır.

Putinin açıqlamaları son dövrlərdə regional və beynəlxalq məsələlər fonunda Azərbaycan-Rusiya münasibətlərinin gündəmdə olduğu bir vaxtda səsləndirilib.