USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Azov dənizində yaralanan azərbaycanlılara konsulluq dəstəyi göstərilir
Azərbaycan Xarici İşlər Nazirliyi Azov dənizində yük gəmilərinə qarşı həyata keçirilən dron hücumu nəticəsində zərər çəkən Azərbaycan vətəndaşlarının vəziyyəti ilə bağlı məlumat yayıb.
Nazirliyin açıqlamasına görə, iyunun 5-də baş vermiş hadisədən sonra Azərbaycanın Rusiyadakı səfirliyinin əməkdaşları dərhal hadisə yerinə yollanıblar. Hazırda səfirliyin konsulluq bölməsinin əməkdaşları Yeysk şəhərində yaralanan və xilas edilən Azərbaycan vətəndaşlarına lazımi konsulluq dəstəyi göstərirlər.
Bildirilib ki, yaralıların vəziyyəti qənaətbəxşdir və onlardan bir neçəsinin yaxın vaxtlarda xəstəxanadan buraxılması gözlənilir.
Məlumata əsasən, Rusiya aidiyyəti qurumları tərəfindən axtarış-xilasetmə tədbirləri davam etdirilir. Həlak olan şəxslərin kimliklərinin müəyyənləşdirilməsi və digər zəruri prosedurlar həyata keçirilir.
Eyni zamanda, xilas edilən Azərbaycan vətəndaşlarının sənədləşdirilməsi, onlara qayıdış şəhadətnamələrinin verilməsi və ölkəyə dönüşlərinin təşkili istiqamətində tədbirlər görülür.
Xarici İşlər Nazirliyi məsələnin xüsusi nəzarətdə saxlanıldığını və aidiyyəti qurumlarla koordinasiyalı iş aparıldığını bildirib.
Nazirlik həlak olan şəxslərin kimliyi və cənazələrinin Azərbaycana gətirilməsi ilə bağlı əlavə məlumatın ictimaiyyətə təqdim ediləcəyini qeyd edib.
