USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Hikmət Hacıyev: “Orta Dəhliz strateji geoiqtisadi sistemə çevrilir”
Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Trans-Xəzər Forumunda Azərbaycanın Avrasiya nəqliyyat əlaqələrindəki rolundan danışıb.
Hikmət Hacıyev sosial şəbəkə hesabında bildirib ki, Orta Dəhliz artıq yalnız tranzit marşrutu deyil, Avropa, Cənubi Qafqaz və Mərkəzi Asiyanı birləşdirən strateji geoiqtisadi sistemə çevrilir.
Onun sözlərinə görə, bu proses Avrasiya nəqliyyat arxitekturasında mühüm dəyişiklikləri əks etdirir. Azərbaycan tərəfindən dəmir yolu, dənizçilik, aviasiya və rəqəmsal infrastruktur sahələrinə yatırılan investisiyalar ölkənin regionda nəqliyyat mərkəzi kimi rolunu gücləndirir.
H.Hacıyev qeyd edib ki, Azərbaycanın coğrafi mövqeyi Cənubi Qafqaz, Mərkəzi Asiya, Avropa, Yaxın Şərq və Xəzər regionları arasında mühüm bağlantı yaratmağa imkan verir.
Prezident köməkçisi vurğulayıb ki, müasir dövrdə dövlətlərin gücü yalnız iqtisadi və hərbi imkanlarla deyil, həm də tərəfdaşlıq əlaqələri, nəqliyyat bağlantıları və qlobal gündəmi formalaşdırmaq bacarığı ilə ölçülür.
O, Azərbaycanın Avrasiya məkanında təhlükəsiz, dayanıqlı və gələcəyə hesablanmış nəqliyyat əlaqələrinin inkişafına sadiq olduğunu bildirib.
