Serbiya Prezidenti Aleksandar Vucic yaxın həftələrdə vəzifəsindən istefa verəcəyini açıqlayıb.

O, bu barədə iyunun 27-də Belqradda tərəfdarları qarşısında çıxışı zamanı danışıb. Vucic bildirib ki, istefasından sonra ölkədə növbədənkənar prezident və parlament seçkiləri keçiriləcək.

Serbiya prezidentinin hazırkı səlahiyyət müddəti 2027-ci ilin ortalarında başa çatmalı idi. Lakin ölkədə artıq uzun müddətdir davam edən tələbə etirazları və erkən seçki tələbləri hakimiyyətə təzyiqi artırıb.

Etirazların əsas səbəbi Novi-Sad şəhərində dəmir yolu vağzalında baş verən faciə olub. Hadisə nəticəsində 16 nəfər həyatını itirib. Etirazçılar bu faciəni korrupsiya və idarəetmədəki ciddi problemlərlə əlaqələndirirlər.

Tələbələr və müxalif qüvvələr Vucic hakimiyyətini korrupsiya, azad sözə təzyiq, siyasi rəqiblərə qarşı zorakılıq və dövlət institutlarını nəzarət altında saxlamaqda ittiham edirlər.

Vucic isə daha əvvəl Konstitusiyanı dəyişərək üçüncü dəfə prezident olmaq niyyətində olmadığını bildirmişdi. Bununla belə, onun parlament seçkilərində iştirak edərək gələcəkdə baş nazir postuna iddia edə biləcəyi qeyd olunur.

Müşahidəçilər hesab edirlər ki, Vucicin istefa qərarı həm tələbə etirazlarının yaratdığı təzyiqin, həm də hakimiyyətin siyasi təşəbbüsü yenidən ələ almaq cəhdinin nəticəsi ola bilər.