Azərbaycan Prezidenti İlham Əliyev iyulun 21-də Almaniya Federativ Respublikasına səfər edib. Səfər çərçivəsində Azərbaycan və Almaniya rəhbərliyi arasında siyasi, iqtisadi və enerji əməkdaşlığına dair danışıqlar aparılıb, iki ölkə arasında mühüm sənədlər imzalanıb.

Prezident İlham Əliyev Berlindəki “Villa Borsig” iqamətgahında Almaniya Prezidenti Frank-Valter Ştaynmayerlə görüşüb. Əvvəlcə dövlət başçılarının təkbətək, daha sonra nümayəndə heyətlərinin iştirakı ilə geniş tərkibdə görüşü keçirilib.

Səfər çərçivəsində İlham Əliyev Almaniyanın Federal Kansleri Fridrix Mertslə də görüşüb. Danışıqların yekununda İlham Əliyev və Fridrix Merts “Azərbaycan Respublikası və Almaniya Federativ Respublikası arasında ikitərəfli tərəfdaşlıq üçün strateji gündəliyə dair Birgə Bəyannamə”ni imzalayıblar.

Bundan başqa, Azərbaycan-Almaniya Biznes Şurasının yaradılması və fəaliyyətinə dair Birgə Bəyannamə imzalanıb.

Görüşlərdə Azərbaycan-Almaniya münasibətlərinin inkişafı, iqtisadi və ticari əməkdaşlıq, enerji təhlükəsizliyi, Cənubi Qaz Dəhlizi, bərpaolunan enerji və hidrogen layihələri, eləcə də Cənubi Qafqazdakı vəziyyət müzakirə olunub.

İlham Əliyev və Fridrix Merts görüşdən sonra mətbuata bəyanatlarla çıxış edərək jurnalistlərin suallarını cavablandırıblar.

Almaniya Kansleri Azərbaycanla əməkdaşlığın ölkəsinin enerji təchizatının şaxələndirilməsi baxımından əhəmiyyətini vurğulayıb. O, xam neft və Cənubi Qaz Dəhlizi vasitəsilə təbii qaz təchizatında əməkdaşlığın hazırkı şəraitdə xüsusi əhəmiyyət daşıdığını bildirib.

Fridrix Merts Azərbaycan və Ermənistan arasında sülh sazişinin paraflanmasını tarixi addım kimi qiymətləndirərək Almaniya və Avropa İttifaqının Cənubi Qafqazda davamlı sülh və sabitliyin təmin edilməsində maraqlı olduğunu deyib.

Mətbuat konfransında Bakıda Almaniya və Rusiya nümayəndələri arasında mümkün gizli görüşün keçirilməsi məsələsinə də toxunulub.

İlham Əliyev bildirib ki, iyulun 12-də Almaniyanın keçmiş kansleri Angela Merkelin administrasiyasının keçmiş rəhbəri Ronald Pofalla və Matias Platsek Berlin-Bakı reysi ilə Azərbaycana gəlib və iyulun 14-də geri qayıdıblar.

Eyni zamanda Rusiyanın keçmiş baş naziri Viktor Zubkov və Rusiya Prezidenti yanında Vətəndaş Cəmiyyəti və İnsan Hüquqları Şurasının rəhbəri Valeri Fadeyevin də həmin tarixdə Moskvadan Bakıya gəldiyi bildirilib.

Prezidentin sözlərinə görə, Azərbaycan tərəfinə bu səfərlərin məqsədi barədə nə Almaniya, nə də Rusiya tərəfindən əvvəlcədən məlumat verilib.

İlham Əliyev həmin şəxslər arasında görüşün keçirildiyini birbaşa təsdiqləyə bilməyəcəyini, lakin uçuş məlumatlarının Bakıda belə bir gizli görüşün baş tutduğunu ehtimal etməyə əsas verdiyini söyləyib.

Prezident mümkün görüşün Rusiya-Ukrayna müharibəsinin başa çatmasına töhfə verəcəyi təqdirdə Azərbaycanın bunu alqışlayacağını bildirib.