"Rossiya" telekanalına verdiyi müsahibədə Vladimir Putin Qarabağda Rusiya ilə birgə Türkiyənin də iştirak edəcəyi Monitorinq Mərkəzinin fəaliyyətinə də toxunub.

"Türkiyənin hərəkətlərinə hər cür qiymət verə bilərsiniz, ancaq Türkiyəni beynəlxalq hüququ pozmaqda günahlandırmaq çətindir. İdlib bölgəsində və Suriya-Türkiyə sərhədində ortaq patrul və konvoylar təşkil etdiyimiz Suriyada da daxil olmaqla Orta Şərqdə çox yaxşı qarşılıqlı təcrübəmiz var. Burada bu cür qarşılıqlı əlaqə tələb olunmur. Ancaq razılığa gəldik ki, pilotsuz uçuş aparatlarından istifadə edəcək ortaq bir mərkəz yaradacağıq, birlikdə bu təyyarələrdən istifadə edərək təmas xətti boyunca vəziyyəti izləyəcəyik, birlikdə məlumat alacağıq və birlikdə təhlil edəcəyik"- V.Putin bildirib.

Rusiya Prezidenti deyib ki, Monitorinq mərkəzi üçün yeri Azərbaycan özü seçəcək: "Bu mərkəz Azərbaycanın suveren ərazisində yerləşəcək. Beynəlxalq hüquqa görə Dağlıq Qarabağ həmişə Azərbaycanın bir hissəsi olub. Ona görə də, Azərbaycanın Monitorinq mərkəzini məqsədəuyğun hesab etdiyi yerdə yerləşdirmək haqda təkbaşına qərar vermək hüququ var".