Bu gün Milli Məclisin plenar iclasında “Hərbi xidmətkeçmə haqqında” Əsasnamənin təsdiq edilməsi barədə Qanuna dəyişiklik edilməsi haqqında qanun layihəsi müzakirə olunaraq üçüncü oxunuşda qəbul edilib.

Qəbul edilən dəyişikliklərə əsasən, müddətli həqiqi hərbi xidmət dövründə zabit hazırlığı kursunu müvəffəqiyyətlə bitirən və zabit kimi xidmətə könüllü davam edən ali təhsilli hərbi qulluqçulara “leytenant” hərbi rütbəsi veriləcək.

Bu əlavələr, hərbi xidmət müddətində özünü yaxşı tərəfdən göstərən və zabit kimi fəaliyyət göstərməyə könüllü razılıq verən ali təhsilli gənclərin xidmətə daha aktiv cəlb olunmasına imkan yaradacaq.

Hazırda qüvvədə olan qanunvericilik isə “leytenant” hərbi rütbəsinin aşağıdakı şəxslərə verilməsini nəzərdə tutur:
• Hərbi təhsil müəssisələrinin məzunlarına;
• Ailə vəziyyətinə və ya səhhətinə görə ehtiyata buraxılan qadın məzunlara;
• Xidmət müddətini başa vurmuş və ya ekstern imtahan vermiş kiçik leytenantlara;
• Müharibə dövründə ixtisar olunmuş tədris proqramı üzrə təhsil alan hərbi qulluqçulara;
• Ali təhsil alıb hərbi hazırlıq keçən mülki ali tədris müəssisələrinin məzunlarına;
• Müddətli həqiqi hərbi xidməti keçmiş və ehtiyat zabiti hazırlığı üzrə imtahanlarda iştirak edənlərə;
• Zabit heyəti vəzifələrinə təyin edilmiş və bu vəzifələri ən azı bir il uğurla yerinə yetirən gizir və miçmanlara;
• Müvafiq hərbi ixtisasa yaxın ali mülki təhsilli qadın hərbi qulluqçulara;
• Müddətli həqiqi hərbi xidmət keçmiş və zabit heyəti vəzifələrinə qəbul edilmiş ali təhsillilərə.

Qanuna edilən yeni dəyişikliklərlə hərbi kadr hazırlığının daha çevik və müasir tələblərə uyğun təşkili, eləcə də ali təhsilli gənclərin zabit heyətinə keçid imkanlarının genişləndirilməsi məqsəd qoyulur.