FOTO INFO AZ xəbər verir ki, 21 yanvar 2026-cı il tarixində Bakı 23 saylı Mediasiya Təşkilatının ictimai təqdimat mərasimi keçirilib. Tədbirdə mediasiya institutunun inkişafında mühüm rol oynayan dövlət və ictimai xadimlər, hüquqşünaslar, mediatorlar və media nümayəndələri iştirak ediblər.

Təqdimat mərasimində Mediasiya Şurası İdarə Heyətinin sədri Nadir Adilov, Milli Məclisin deputatı Məlahət İbrahimqızı, 62 saylı məktəb-liseyin direktoru Cabbarlı Mətanət, Bakı 23 saylı Mediasiya Təşkilatının direktoru Həsən Sadıqov, təsisçi Esmira Rzayeva, “Arbitrium” Vəkil Bürosunun direktoru Polad Mehdi, Bakı 9 saylı Mediasiya Təşkilatının direktoru Leyla Nəsibova, Bakı 21 saylı Mediasiya Təşkilatının direktoru Zaur Mirzəbəyov, Bakı 24 saylı Mediasiya Təşkilatının direktoru Ülkər Zülfüqarova, Bakı 25 saylı Mediasiya Təşkilatının direktoru Aqil Əsgərov, Quba 1 saylı Mediasiya Təşkilatının direktoru Hümmət Əliyev, vəkillər Kamran Məmmədov, Kamilə Raxtari, İlqar Abbasov, Əkbər Yusifoğlu, mediatorlar Elçin Quliyev, Fərhad Mehdiyev, həmçinin jurnalist Nüranə Gülər iştirak ediblər.

Tədbiri giriş sözü ilə açan Mediasiya Şurası İdarə Heyətinin sədri Nadir Adilov çıxışında mediasiya institutunun Azərbaycanda keçdiyi inkişaf yolundan bəhs edib. O bildirib ki, mediasiya təşkilatları məhkəməyə alternativ mübahisə həll mexanizmi kimi vətəndaş məmnunluğunun təmin edilməsində mühüm rol oynayır. Nadir Adilov, eyni zamanda, 2025-ci ilin mediasiya sahəsi üzrə yekun nəticələrini iştirakçıların diqqətinə çatdıraraq bu sahədə əldə olunan müsbət göstəriciləri vurğulayıb.

Daha sonra çıxış edən Milli Məclisin deputatı Məlahət İbrahimqızı Prezident İlham Əliyev tərəfindən qəbul edilən “Mediasiya haqqında” Azərbaycan Respublikası Qanununun əhəmiyyətini xüsusi qeyd edib. Deputat bu qanundan irəli gələrək vətəndaşlarla kommunikasiyanın gücləndirilməsi istiqamətində deputatlar və Mediasiya Şurası arasında qurulan əməkdaşlığı yüksək qiymətləndirdiyini bildirib. O, yeni fəaliyyətə başlayan Bakı 23 saylı Mediasiya Təşkilatına uğurlar arzulayaraq, bu qurumun hüquqi maarifləndirmə və mübahisələrin sülh yolu ilə həllində mühüm rol oynayacağına inandığını deyib.

Tədbirin sonunda Bakı 23 saylı Mediasiya Təşkilatının təsisçisi Esmira Rzayeva çıxış edərək qonaqlara təşəkkürünü bildirib. O, təşkilatın fəaliyyət istiqamətləri, iş prinsipləri və məqsədləri barədə məlumat verib, daha sonra isə iştirakçıları təşkilatın ofis şəraiti və iş rejimi ilə yaxından tanış edib.

Qeyd edək ki, Bakı 23 saylı Mediasiya Təşkilatının fəaliyyəti ölkədə mediasiya institutunun genişlənməsinə və hüquqi mübahisələrin daha çevik, səmərəli şəkildə həllinə töhfə verməyi hədəfləyir.