2024-cü ilin yanvarında Respublika Perinatal Mərkəzində baş vermiş və 7 körpənin həyatına son qoymuş yanğınla bağlı cinayət işi üzrə məhkəmə araşdırması yekunlaşıb.

Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə keçirilən prosesdə hökm elan olunub.

Məhkəmə kollegiyası təqsirləndirilən şəxslərə qarşı irəli sürülmüş ittihamların məhkəmə istintaqı zamanı araşdırılmış sübutlar və şahid ifadələri ilə təsdiq olunduğu qənaətinə gəlib.

Hökmə əsasən, Perinatal Mərkəzin sabiq direktoru Mehriban Abasquliyeva 7 il 3 ay müddətinə azadlıqdan məhrum edilib. O, hökm elan olunduqdan sonra məhkəmə zalında həbs olunub.

Digər təqsirləndirilən şəxslərdən Anesteziologiya, reanimasiya və intensiv terapiya şöbəsinin müdiri Hamlet Mustafayev 5 il 8 ay, Dəstək Xidmətləri şöbəsinin müdiri Elnur Əhmədli isə 5 il 2 ay müddətinə azadlıqdan məhrum ediliblər. Onlar da məhkəmə zalında həbs olunublar.

Xatırladaq ki, yanğın hadisəsi 2024-cü ilin yanvar ayında Respublika Perinatal Mərkəzində baş verib və nəticədə 7 körpə həyatını itirib. Hadisə ilə bağlı Azərbaycan Respublikasının Baş Prokurorluğunun İstintaq İdarəsində araşdırma aparılıb.

İstintaqın nəticələrinə əsasən təqsirləndirilən şəxslərə Azərbaycan Respublikası Cinayət Məcəlləsinin 308.2-ci maddəsi (ağır nəticələrə səbəb olan vəzifə səlahiyyətlərindən sui-istifadə) və Azərbaycan Respublikası Cinayət Məcəlləsinin 225.3-cü maddəsi (yanğın təhlükəsizliyi qaydalarının pozulması nəticəsində iki və daha çox şəxsin ölümünə səbəb olma) maddələri ilə ittiham irəli sürülüb.

Bu iş Azərbaycanda səhiyyə müəssisələrində təhlükəsizlik qaydalarına əməl olunması və məsuliyyət məsələləri ilə bağlı geniş ictimai müzakirələrə səbəb olmuşdu.