Jurnalist və media fəalı Abid Qafarov Azərbaycanda və xaricdə fəaliyyət göstərən müstəqil jurnalistlərin təhlükəsizlik problemlərinə diqqət çəkmək məqsədilə “NO-ID Journalism” adlı yeni təşəbbüslə çıxış edib.

Təşəbbüsün təqdimatında qeyd olunur ki, Azərbaycanda jurnalist fəaliyyəti getdikcə daha riskli sahəyə çevrilib. Bildirilir ki, hazırda həbsdə olan 26 jurnalistin mövcudluğu ölkədə media azadlığının vəziyyəti ilə bağlı ciddi narahatlıqlar yaradır. Müraciətdə vurğulanır ki, hər bir həbs faktının arxasında yarımçıq qalmış araşdırmalar, fəaliyyətini dayandırmağa məcbur olmuş redaksiyalar və cəmiyyətin informasiya almaq hüququnun məhdudlaşdırılması dayanır.

Layihə müəllifi diqqəti yalnız ölkədaxili təzyiqlərə deyil, həmçinin xaricdə yaşayan jurnalist və fəallara qarşı həyata keçirilən təqib, təhdid və təzyiq hallarına da yönəldib. Bildirilir ki, müxtəlif hesabatlarda jurnalistlərə qarşı transmillli repressiya, fiziki hücum və digər təzyiq formaları sənədləşdirilib.

Qafarovun sözlərinə görə, Caspian Watch layihəsi çərçivəsində əməkdaşlıq üçün müraciət edilən bir sıra jurnalistlər təşəbbüsə dəstək versələr də, onların əksəriyyəti təhlükəsizlik səbəbindən şəxsiyyətlərinin gizli saxlanılmasını istəyib.

Məhz bu reallıqdan çıxış edərək yaradılan “NO-ID Journalism” təşəbbüsü anonim və ya təxəllüslə fəaliyyət göstərmək məcburiyyətində qalan jurnalistlər üçün platforma rolunu oynamağı hədəfləyir. Layihənin məqsədi həm media sahəsindəki problemlərə diqqət çəkmək, həm də təzyiq altında çalışan jurnalistlərin fəaliyyətini davam etdirməsinə dəstək verməkdir.

Təşəbbüs çərçivəsində şəxsiyyəti məxfi saxlanılacaq jurnalistlər yazılarını təxəllüslə dərc edə biləcəklər. Onlar Caspian Watch saytının “Haqqımızda” bölməsində də həmin təxəllüslərlə təqdim olunacaq. Avatar şəkillərinin yerinə isə hazırda həbsdə olan jurnalistlərin fotolarından istifadə ediləcəyi bildirilir. Layihə müəllifləri bununla “həmkarımın işi yaşayır” mesajını verməyi hədəflədiklərini qeyd edirlər.

Abid Qafarov jurnalistləri, media nümayəndələrini və vətəndaş cəmiyyəti fəallarını təşəbbüsə qoşulmağa çağırıb. Onun sözlərinə görə, layihə açıq adla və ya təxəllüslə, ideya, təcrübə, məsləhət və ya əlaqə dəstəyi ilə iştirak etmək istəyən hər kəs üçün açıqdır.

“NO-ID Journalism” təşəbbüsünün yaxın dövrdə media azadlığı və jurnalist təhlükəsizliyi sahəsində yeni əməkdaşlıq imkanları yaratması gözlənilir.