Elm və təhsil naziri Emin Əmrullayev repetitorluğun ləğvi və ya qadağan olunması ilə bağlı məsələyə münasibət bildirib.

Nazir Trend Beynəlxalq İnformasiya Agentliyi, APA İnformasiya Agentliyi və “Xəzər TV”nin birgə müsahibəsində deyib ki, repetitorluğu ləğv etmək və ya qadağan etmək praktiki baxımdan mümkün deyil.

Emin Əmrullayevin sözlərinə görə, nəzəri olaraq belə bir qərar qəbul edilə bilər. Lakin onun real həyatda icrası mümkün olmayan addım hesab olunur. Nazir bildirib ki, repetitorluğun qadağan edilməsinin öyrənmə və insan inkişafı baxımından müsbət nəticə verəcəyinə inanmır.

“Hamı üçün eyni şəraitin yaradılması rəqabətli qəbul sistemi ilə tam üst-üstə düşmür. Repetitorluğu ləğv etmək və ya qadağan etmək mümkün deyil”, — deyə nazir vurğulayıb.

Emin Əmrullayev qeyd edib ki, uzunmüddətli həll yolu ali təhsilə qəbul sisteminə yanaşmanın dəyişməsində ola bilər. Onun fikrincə, ali təhsil sadəcə təhsilin növbəti pilləsidir və ali məktəbə qəbul çətin olmamalıdır. Əsas tələbkarlıq isə ali təhsili başa vurmaq mərhələsində olmalıdır.

Nazir bildirib ki, Azərbaycanda ali təhsili bitirmə ehtimalı 85-90 faizdən yuxarıdır. Onun sözlərinə görə, tələbə qəbul olunursa, böyük ehtimalla universiteti də bitirir və bu göstərici daha çox narahatlıq doğurmalıdır.

“Mühəndis olmaq rahat proses olmamalıdır. Dünyanın heç bir yerində yaxşı mühəndis olmaq üçün rahat yol yoxdur. İnsan uğur əldə etmək üçün müəyyən çətinliklərdən keçməlidir. İstənilən peşənin ən yaxşılarından biri olmaq kifayət qədər zəhmət, tələbkarlıq və narahatlıq tələb edir”, — deyə Emin Əmrullayev əlavə edib.