Avropanın bir sıra ölkələrində iyun ayı üçün rekord istilər qeydə alınıb.

Almaniyada ən yüksək temperatur ölkənin cənub-qərbində, Fransa ilə sərhədə yaxın yerləşən Saarbrücken şəhərində qeydə alınıb. Burada havanın temperaturu 41,3 dərəcəyə çatıb.

Kəskin istilər Belçika və Niderlandda da rekord göstəricilərlə müşayiət olunub. Belçikanın Kleine-Brogel şəhərində temperaturun 40 dərəcəyə yüksəldiyi bildirilir. Niderlandın Limburq vilayətində isə 39,4 dərəcə isti qeydə alınıb.

Böyük Britaniyada da iyun ayı üçün temperatur rekordları yenilənib. Suffolk qraflığında hava 37,3 dərəcəyə qədər isinib. Bu, ölkədə son 50 ilin iyun ayı üçün ən yüksək göstəricilərindən biri hesab olunur.

İsti hava səbəbindən Avropanın müxtəlif bölgələrində qatar reysləri ləğv edilib, yüzlərlə məktəb bağlanıb. Səhiyyə qurumları xəstəxanalara müraciət edənlərin sayında artım olduğunu bildirir.

Fransada səhiyyə rəsmiləri bir çox insanın xüsusilə evlərində isti hava səbəbindən həyatını itirdiyini açıqlayıblar. Dünya Meteorologiya Təşkilatı isə belə hava şəraitinin insan sağlamlığına, kənd təsərrüfatına və ekosistemlərə ciddi təsir göstərdiyini bəyan edib.

Sinoptiklərin məlumatına görə, isti hava dalğası Avropanın şimal və şərq istiqamətinə doğru hərəkət edir.