Bu il ali təhsil müəssisələrinə qəbul prosesi əvvəlki illərlə müqayisədə daha gərgin rəqabətlə müşahidə olunur. Dövlət İmtahan Mərkəzinin İdarə Heyətinin sədri Məleykə Abbaszadənin verdiyi məlumata görə, 2024-cü ildə ali məktəblərə sənəd verən abituriyentlərin sayı 130 mindən çoxdur. Bu göstərici ötən illə müqayisədə təxminən 12 min nəfər artım deməkdir.

Nazirlər Kabineti mülki ali təhsil müəssisələri üçün 2024-cü il üzrə qəbul planını təsdiqləyib. Bu il ümumilikdə 60 489 yer ayrılıb ki, bu da ötən illə müqayisədə 1300 yer, yaxud 2% çoxdur. Təhsil eksperti Elçin Əfəndi bildirib ki, ümumilikdə ayrılmış plan yerlərinin sayı 63 minə yaxındır. Onlardan yalnız kiçik bir hissəsi xüsusi təyinatlı ali təhsil müəssisələrinə aiddir.

Ekspert qeyd edir ki, bu il 1, 2, 3 və 4-cü ixtisas qruplarının imtahanlarında iştirak edəcək abituriyentlərin sayı 91 min nəfəri ötür. İkinci mərhələdə isə bu rəqəmə əlavə olaraq 2-3 min nəfərin də qoşulması gözlənilir. Beləliklə, ali məktəblərə qəbul imtahanlarında ümumilikdə təxminən 94 min nəfərin iştirak edəcəyi proqnozlaşdırılır.

Sadə hesablama ilə bu o deməkdir ki, hər iki abituriyentdən yalnız biri tələbə adını qazana biləcək. Bu da qəbul prosesində ciddi rəqabətin yaranmasına səbəb olur.

Ən çox plan yeri 1-ci ixtisas qrupuna ayrılıb. Növbəti sıralarda 2-ci, 4-cü və 3-cü qruplar gəlir. 5-ci qrupda da müəyyən artım müşahidə olunur. Ekspertin sözlərinə görə, bu artım və müraciət edənlərin çoxluğu nəticəsində keçid ballarında enmə yox, əksinə, artım gözlənilir.

Məsələn, 2-ci qrup üzrə ötən il 22 min abituriyent müraciət etmişdi və onlardan 11 mini müsabiqəyə buraxılmışdı. Bu il isə müraciətlərin sayı 25 minə çatıb və gözlənti ondan ibarətdir ki, 12 mindən çox abituriyent müsabiqə şərtlərini ödəyəcək.

Qeyd edək ki, bir çox ixtisaslarda minimum keçid balı 150-dir. Dövlət sifarişi əsasında təhsil almaq istəyən abituriyentlər isə minimum 200 bal toplamalıdırlar. Bu balın 100-ü blok imtahanından əldə edilməlidir.

Beləliklə, bu il abituriyentlər üçün tələbə adını qazanmaq əvvəlkindən daha çətin olacaq və yüksək nəticə göstərmək üçün daha ciddi hazırlaşmaq tələb olunur.