Hazırda həbsdə olan seçki mütəxəssisi Akif Qurbanovun istintaq təcridxanasında hədələndiyi barədə məlumat verilib.

Məlumatı Akif Qurbanovun spiker olduğu III Respublika Platforması yayıb:

"III Respublika Platformasının

B ə y a n a t ı

4 iyun 2024-cü il
(İngilis dilində şərh bölümündə)

Əldə etdiyimiz və dəqiqləşdirilmiş məlumata görə III Respublika Platformasının spikeri Akif Qurbanov ciddi təhdidlərə məruz qalıb. Belə ki, yüksək rütbəli dövlət məmuru Bakı İstintaq Təcridxanasına gələrək Akif Qurbanovu sərt dillə hədələyib. Ondan özünümüdafiə xarakterli çıxışlardan imtina etmək, o cümlədən, çıxışlarında dövlət başçısının adını çəkməmək tələb olunub. Əks təqdirdə ona qarşı pis rəftarın tətbiq ediləcəyi, hətta işgəncəyə məruz qalacagı ilə təhdid edilib.

Eyni zamanda, Toplum TV və Demokratik Təşəbbüslər İnstitutu işi bağlı qanunsuz həbs edilmiş digər şəxsləri Bakı İstintaq Təcridxanasının rəisi Elnur İsmayılov şəxsən təhdid edərək bildirib ki, əgər Akif Qurbanov məhkəmə çıxışlarına davam edərsə sizin vəziyyətiniz daha da ağırlaşacaq. Onlara qarşı da rəftarın pisləşəcəyi ilə bağlı sərt hədələr səsləndirib.

III Respublika Platforması bəyan edir ki, hazırda tənqidi mövqedə olan şəxslərə qarşı təhlükə sadəcə onlara qarşı siyasi motivli cinayət işlərinin açılması və bu çərçivədə onların həbsə atılmalarından ibarət deyil. Hətta istintaq təcridxanası və cəzaçəkmə müəssisələrində də siyasi məhbuslar pis rəftar və işgəncəyə məruz qalma təhlükəsi ilə üz-üzədirlər.

Qeyd edirik ki, işgəncəyə məruz qoymaqla hədələmə özü ləyaqəti alçaldan rəftardır və Azərbaycan Respublikasının qoşulduğu və beynəlxalq hüquqi öhdəlik götürdüyü BMT-nin Sivil və Siyasi Hüquqlara dair Beynəlxalq Paktının 7-ci maddəsi, İşgəncəyə, Digər Qəddar, Qeyri-İnsani və Ləyaqəti Alçaldan Rəftara və Cəzaya qarşı Konvensiyası və Avropa İnsan Hüquqları Konvensiyasının 3-cü maddəsi ilə qorunan hüquqlarının pozuntusudur.

Biz, vəziyyətin bu həddə çatması ilə bağlı həyəcan təbili çalırıq və siyasi məhbusların sağlamlığı, ləyaqəti, hətta həyatı ilə bağlı ciddi təhlükələrin yarandığı indiki şəraitdə Azərbaycan Hökumətindən bu qeyri-insani davranışlara son qoymağı, bütün siyasi məhbusları dərhal azad etməyi tələb edirik.

Həmçinin Azərbaycan Respublikasında yerləşən beynəlxalq təşkilatların heyətlərini və səfirliklərin diplomatik korpusunu Akif Qurbanova və eyni ittihamla həbs edilmiş digər şəxslərə qarşı hökumətin amansız davranışlarının dayandırılması üçün öz mandatları çərçivəsində fəaliyyətə çağırırıq."

Bildirilir ki, yüksək rütbəli dövlət məmuru Bakı İstintaq Təcridxanasına gələrək Akif Qurbanovu sərt dillə hədələyib:

"Ondan özünümüdafiə xarakterli çıxışlardan imtina etmək, o cümlədən, çıxışlarında dövlət başçısının adını çəkməmək tələb olunub. Əks təqdirdə ona qarşı pis rəftarın tətbiq ediləcəyi, hətta işgəncəyə məruz qalacağı ilə təhdid edilib."

Platformanın məlumatında deyilir.

Platformanın yaydığı məlumatda o da qeyd olunur ki, təhdid və hədə yalnız Akif Qurbanova qarşı yox, Toplum TV və Demokratik Təşəbbüslər İnstitutunun saxlanılan digər şəxslərinə qarşı da edilib.

"Həbs edilən digər şəxsləri Bakı İstintaq Təcridxanasının rəisi Elnur İsmayılov şəxsən təhdid edərək bildirib ki, əgər Akif Qurbanov məhkəmə çıxışlarına davam edərsə sizin vəziyyətiniz daha da ağırlaşacaq. Onlara qarşı da rəftarın pisləşəcəyi ilə bağlı sərt hədələr səsləndirib."

Platformanın məlumatında deyilir.
Akif Qurbanov məhkəmədə nə deyib?

28 mayda Akif Qurbanov Apelyasiya Məhkəməsində çıxış edib. O, çıxışında özü ilə bağlı hökumətyönlü medialarda yayımlanan iddialara cavab verib.

İndi Azərbaycan da Stalin və onun NKVD üsulu ilə idarə olunur. Necə ki Stalin drektiv göndərərək “minin belinə, etiraf etməyincə düşməyin” üslubunu tələb edir, NKVD də icra edirdi.

Qurbanov məhkəmədə deyib.
Akif Qurbanov necə həbs edilib?

Bu ilin 6 martında “Toplum TV”, “Demokratik Təşəbbüslər İnstitutu” və “III Respublika Platforması” ilə bağlı cinayət işi başlanıb. Ümumilikdə 7 nəfər saxlanılıb. Onlar barədə Cinayət Məcəlləsinin 206.3.2-ci (qaçaqmalçılıq, qabaqcadan əlbir olan bir qrup şəxs tərəfindən törədildikdə) maddəsi ilə cinayət işi açılıb.

8 martda isə Xətai Rayon Məhkəməsi Akif Qurbanov barədə 4 aylıq həbs qətimkan tədbiri seçib.

“III Respublika Platforması” nə deyir?

Platforma yaydığı bəyanatda Azərbaycan hökumətindən qeyri-insani davranışlara son qoymağı tələb edir.

"Biz, vəziyyətin bu həddə çatması ilə bağlı həyəcan təbili çalırıq və siyasi məhbusların sağlamlığı, ləyaqəti, hətta həyatı ilə bağlı ciddi təhlükələrin yarandığı indiki şəraitdə Azərbaycan Hökumətindən bu qeyri-insani davranışlara son qoymağı, bütün siyasi məhbusları dərhal azad etməyi tələb edirik."

Platformanın bəyanatında deyilir.