“Müdafiə Xətti” İnsan Haqları Təşkilatı

Bakı şəhəri, 30 dekabr 2022-ci il

2022-ci ilin oktyabr, noyabr, dekabr aylarında Azərbaycanda insan hüquqları sahəsində mövcud durum daha da pisləşib.

Azərbaycanda siyasi ağırlıqlı cinayət və inzibati təqiblər artıb, hakim siyasətin tənqidçilərinə münasibətdə repressiv tədbirlər tətbiq edilib, saxta ittihamlarla cəmiyyətdən təcrid etmə halları çoxalıb, demokratik quruluşa təminat verilməyib, vətəndaş cəmiyyətinin bərqərar edilməsinə nail olunmayıb, xalqın iradəsinin ifadəsi kimi qanunların aliliyini təmin edən hüquqi dövlət qurulmayıb.

Hakimiyyət qolları arasında ali icra hakimiyyəti dominantlığı ilə fərqlənib. Məhkəmələr, hüquq mühafizə orqanları siyasi hakimiyyətin təsir və təzyiqi altında fəaliyyət göstərib, müxalif fəallara qarşı sifarişli qərarlar çıxarıblar. Qanunverici orqan icra hakimiyyətinin davamı kimi diqqət cəlb edib.

Azərbaycan Respublikasının Konstitusiyasının III fəslində təsbit edilmiş əsas insan və vətəndaş hüquqları və azadlıqları, xüsusilə, hamının qanun və məhkəmə qarşısında bərabərliyi, ədalətli mühakimə, söz və fikir azadlıqları pozulub, qanunsuz cəzalandırmalar geniş vüsət alıb.

Polis idarə və şöbələrində, cəzaçəkmə müəssiələrində, istintaq təcridxanalarında pis rəftarlar, işgəncə halları qeydə alınıb.

Yığıncaqlar azadlığına imkan verilməyib. Sərbəst toplşamaq azadlığı faktiki olaraq yasaq edilib. Müxalifətdə olan AXCP-nin, Müsavatın, ADR-in bir neçə dəfə piket və mitinq təşəbbüsləri polis qüvvələrinin zorakılığı ilə müşayiət edilib.

Siyasi təsisatların fəaliyyəti yeni əngəllərə məruz qalmaqdadır. Parlamentdə növbəti oxunuşdan keçən “Siyasi partiyalar haqqında” qanun qüvvəyə minərsə, vətəndaşların dövlətin və cəmiyyətin siyasi həyatında iştirak etmək hüququ daha ciddi məhdudiyyətlərə məruz qalacaqdır.

Hökumət idarəçikdə sərtliyə üstünlük verməkdədir. Siyasi və hüquqi açılımlara hazır olmadığı aşkardır.







https://www.youtube.com/watch?v=jrKvX5jrrGM