2020-ci ilin payızında Kamçatkada güclü ekoloji iqlim fəlakəti baş verib, nəticədə minlərlə dəniz heyvanı, balıq məhv olub. İlk həyəcan siqnalını çimərliklərdə sörfinqlə məşğul olanlar verib, onlar sudan gözlərinin yandığını, qıcıqlandığını deyirdilər. Cəmi 2 ay sonra sahil minlərlə dəniz kirpisi, dəniz ulduzu, krab ölüləri ilə dolub.

Avrasiya.net Medicina.az-a istinadən xəbər verir ki, o zaman ekoloqlar baş verənlərin səbəbkarı kimi Kozelski yaxınlığındakı kimyəvi maddələr poliqonunu gördülər. Payızda güclü yağışlar zamanı təhlükəli zəhərli maddələr poliqon ərazisindən yaxınlıqdakı çaya qarışmış, ordan da açıq okeana axmışdı.

Sputnikdən çəkilən şəkillərdə də okeana axan çayların rəngində dəyişiklik açıq görünüb. Lakin sonradan bu versiya ikinci plana keçib, yerli hökumət var gücü ilə insidenti ört-basdır edib, hər cür açıqlamadan yayınıb, elə də ciddi təhlükə olmadığına əmin edib.

Sonradan məlum olub ki, ekoloji fəlakətə səbəb zəhərli dəniz yosunları olub, onlar okeanların müxtəlif dərinliklərində var. Məhz dəniz yosunlarının çiçəklənməsi dövründə sahilyanı sular zəhərlənib, qırmızı axın əmələ gəlib və bu axın yolunda olan bütün dəniz canlılarını məhv edib.

Alimlər bildirir ki, okeanda, dənizlərdə belə ölü zonaların, sahələrin miqyası, dairəsi getdikcə artır. Bu zonalarda heç bir dəniz canlısı yaşamır. Bir çox yosun ailələri aktiv çoxalma zamanı suya toksin, zəhər buraxır. Bu proses ilin bütün fəsillərində baş verə bilər. Məhz bu toksinlər su axını ilə çaydan dənizə, okeandan okeana keçir, beləliklə, digər dəniz heyvan və bitkiləri məhv olur. Toksikli yosunlar su höfzələrində indi hər yerdədir.