Rusiyanın Ulyanovsk vilayətində yerli hakimiyyət orqanları bəzi ərazilərdə mobil internetə çıxışın federal səviyyədə qəbul edilən qərarla qeyri-müəyyən müddətə dayandırıldığını açıqlayıblar.

Rəsmilərin sözlərinə görə, bu qərar yalnız Ulyanovsk vilayətinə aid deyil.

“Qadağa təkcə Ulyanovskda deyil, Rusiyanın müxtəlif regionlarında, əsasən xüsusi təyinatlı obyektlərin yaxınlığında tətbiq olunur. Keçən həftə federal mərkəz belə obyektlərin ətrafında təhlükəsizlik zonalarının genişləndirilməsi barədə qərar qəbul edib. Bu, hücum dövrü üçün müvəqqəti tədbir deyil, daimi məhdudiyyətdir. Regional hakimiyyətlər bu qərara təsir göstərə bilmirlər,” – deyə yerli rəsmilər bildiriblər.

Məlumata görə, məhdudiyyət tətbiq edilən ərazilərdə internet yalnız “ağ siyahı” üzrə işləyəcək. Yəni hökumətin icazə verdiyi saytlar açıq olacaq. Bu siyahıya aşağıdakılar daxildir:
• “Gosuslugi” (Dövlət xidmətləri portalı)
• “Yandex” xidmətləri
• “VKontakte” və “Odnoklassniki” sosial şəbəkələri
• “Ozon” və “Wildberries” onlayn platformaları
• “Mir” ödəniş sistemi

“Na svyazi” layihəsinin məlumatına əsasən, bəzi bölgələrdə mobil internet artıq bir həftədən çoxdur ki, əlçatan deyil.

Bundan əvvəl məlum olmuşdu ki, Rusiyanın Rəqəmsal İnkişaf Nazirliyi rabitə haqqında qanuna dəyişikliklər layihəsi hazırlayıb. Yeni təkliflərə əsasən, internet operatorları Federal Təhlükəsizlik Xidmətinin (FSB) sorğusu əsasında rabitə xidmətlərini dayandırmaq məcburiyyətində qalacaqlar.

Ekspertlər hesab edirlər ki, Kremlin bu addımı ölkə daxilində internetə çıxışın məhdudlaşdırılmasını qanuniləşdirməyə yönəlib.