Milli Məclisin deputatı Fəzail Ağamalının oğlu Elçin Ağamalı “Ana Vətən” Partiyasından qovulub.

Bu barədə qərar partiyanın İdarə Heyətinin iclasında qəbul edilib.

Partiyadan verilən məlumata görə, Elçin Ağamalı növbədənkənar IX Qurultay zamanı prosedur qaydalarını kobud şəkildə pozub, həmçinin “Siyasi partiyalar haqqında” Qanunun və partiya nizamnaməsinin bir neçə maddəsinin tələblərini pozaraq partiyanın nüfuzuna xələl gətirən hərəkətlərə yol verib.

İdarə Heyəti Nizamnamənin 5.8.1-ci bəndinə əsaslanaraq Elçin Ağamalının partiyadan xaric edilməsi barədə qərar qəbul edib.

Bundan əlavə, partiyanın 12 rayon təşkilatının sədrlərinin Qurultayda saxtakarlığa yol verdiyi müəyyən edilib. Belə ki, onlar partiya üzvü olmayan 25 nəfəri Qurultayın nümayəndəsi kimi təqdim ediblər.

Aparılan araşdırmaların nəticəsində həmin 12 rayon təşkilat sədrləri – Ağstafa, Ağsu, Bərdə, Hacıqabul, Kürdəmir, Qazax, Lənkəran, Masallı, Sabunçu, Şabran, Zərdab və Suraxanı rayon təşkilatlarının rəhbərləri də partiyadan çıxarılıb, bu təşkilatların fəaliyyəti dayandırılıb.

Eyni zamanda, Qurultayın Təşkilat Komissiyasının sədri Ülvi Bayramova prosesdəki nöqsanlara görə töhmət verilib.

Həmçinin, partiyanın Ali Məclisinin sədri Rəşadət Yaqublu üzvlükdən çıxmaqla bağlı ərizə təqdim edib və onun partiya üzvlüyünə xitam verilib.

İdarə Heyətinin iclasında qəbul edilən bütün qərarlar yekdilliklə təsdiqlənib.