Həbsdə olan işçi hüquqları fəalı Afiəddin Məmmədovun 2 saylı Cəzaçəkmə Müəssisəsində telefonla danışmaq hüququ məhdudlaşdırılıb.

Bu barədə məlumatı fəalın sədri olduğu “İşçi Masası” Həmkarlar İttifaqları Konfederasiyası “Toplum TV”-yə açıqlayıb.

Təşkilatın bildirdiyinə görə, qadağaya səbəb Afiəddin Məmmədovun jurnalist Ülviyyə Əliyə verdiyi müsahibə olub. Müsahibədə fəal təcridxanadakı saxlanma şəraitinin ağır olduğunu, xəstə məhbuslar üçün həkim təminatının olmadığını deyib.

Məlumata əsasən, müəssisənin əməkdaşı Vüsal Aslanov fəalın telefonla danışmasına mane olur, onun başqa məhbuslarla ünsiyyətini məhdudlaşdırır və hətta onları Məmmədova qarşı mübahisəyə təhrik edir.

“İşçi Masası”nın bəyanatında qeyd olunur ki, hazırda Afiəddin Məmmədovun vəziyyəti barədə məlumat yoxdur.

Afiəddin Məmmədov 2023-cü ilin sentyabrın 20-dən həbsdədir. Ona qarşı Cinayət Məcəlləsinin xuliqanlıq niyyətilə bədənə ağır xəsarət yetirmə və silah qismində əşyadan istifadə etməklə xuliqanlıq maddələri ilə ittiham irəli sürülüb.

Fəal ilk dəfə 2023-cü ildə kuryerlərin mopedlərinin kütləvi şəkildə cərimə meydançasına aparılmasına etiraz aksiyası zamanı saxlanılmış və 30 sutka inzibati həbs cəzası almışdı.

Bu il yanvarın 14-də Bakı Ağır Cinayətlər Məhkəməsi onun barəsində 8 il müddətinə azadlıqdan məhrumetmə hökmü çıxarıb.

2022-ci ildə yaradılan “İşçi Masası” Həmkarlar İttifaqları Konfederasiyasının dörd üzvü — sədr Afiəddin Məmmədov, eləcə də Ayxan İsrafilov, Elvin Mustafayev və Möhyəddin Orucov hazırda həbsdədir.
Təşkilat onların hamısına qarşı irəli sürülən ittihamları qurama və siyasi motivli adlandırır.