Noyabrın 5-də Bakı Apellyasiya Məhkəməsi “Meydan TV işi” üzrə həbsdə olan jurnalist Aytac Tapdığın (Əhmədova) nikaha girməsinə qoyulan qadağa ilə bağlı qərarını açıqlayıb.

Məhkəmə jurnalistin və onun nikaha girmək istədiyi şəxs – heyvan hüquqları fəalı Kamran Məmmədlidən gələn şikayəti təmin etməyib, Xətai Rayon Məhkəməsinin əvvəlki qərarını qüvvədə saxlayıb.

Kamran Məmmədli bildirib ki, onlar məhkəmədə müdafiə çıxışları etsələr də, hakimlər qərarlarını əsaslandırmayıblar. Onun sözlərinə görə, gələn həftə cütlük yenidən Xətai Rayon Məhkəməsinə müraciət edərək nikah məsələsi ilə bağlı yeni iş açılması üçün müraciət edəcək.

Xatırladaq ki, oktyabrın 23-də Xətai Rayon Məhkəməsi Aytac Tapdığın saxlanıldığı Bakı İstintaq Təcridxanasında nikaha girməklə bağlı şikayətini təmin etməmişdi.

Aytac Tapdıq 2023-cü ilin dekabrında “Meydan TV işi” üzrə saxlanılan jurnalistlər arasındadır. Həmin vaxt saytın Azərbaycan nümayəndəliyinin rəhbəri Aynur Elgünəş, jurnalistlər Ramin Deko, Aysel Umudova, Xəyalə Ağayeva, Natiq Cavadlı da həbs olunmuşdu. Daha sonra Şəmşad Ağa (Ağayev), Nurlan Libre (Qəhrəmanlı), Fatimə Mövlamlı, Ülviyyə Əli (Quliyeva) və fotoqraf Əhməd Muxtar da eyni iş üzrə saxlanılmışdılar.

Saxlanılan jurnalistlərin heç biri özünü təqsirli hesab etmir.