Avropa İnsan Hüquqları Məhkəməsi (AİHM) ictimai fəal Əmrah Təhməzovun 2023-cü ildə inzibati qaydada həbsinə dair şikayəti üzrə qərar qəbul edib.

Fəal “Toplum TV”yə bildirib ki, qərar bu ilin fevralın 6-da verilsə də, onun nüsxəsi noyabrın 7-də özünə təqdim olunub.

Şikayət Əmrah Təhməzovun 2023-cü il mayın 29-da inzibati qaydada həbs olunması ilə bağlı idi. O, İnzibati Xətalar Məcəlləsinin 510-cu (xırda xuliqanlıq) və 535.1-ci (polisin qanuni tələbinə tabe olmama) maddələri ilə 30 sutka inzibati həbs cəzası almışdı.

Təhməzov ittihamları rədd edib və həbsi “Facebook” səhifəsində etdiyi tənqidi paylaşımlarla əlaqələndirib. O, xüsusilə AXCP-nin Salyan şöbəsinin həbsdə olan sədri Əlizamin Salayevin aclıq aksiyasına dəstək verən və Prezident İlham Əliyevi tənqid edən paylaşımına görə cəzalandırıldığını bildirmişdi.

AİHM qərarında qeyd olunub ki, fəalın “ədalətli məhkəmə araşdırması hüququ” pozulub. Məhkəmə Avropa İnsan Hüquqları Konvensiyasının 6-cı maddəsinin – “qanunla yaradılmış müstəqil və qərəzsiz tribunal tərəfindən ədalətli və açıq dinlənmə hüququnun” – pozuntusunu tanıyıb.

Qərarda göstərilir ki, Azərbaycan hökuməti də bu pozuntunu rəsmən qəbul edib. Nəticədə AİHM işi hökumətin birtərəfli bəyanatı əsasında siyahıdan çıxarıb və ərizəçiyə maddi və mənəvi zərərə görə 900 avro, hüquqi xərclərə görə isə 225 avro təzminat ödənilməsinə qərar verib.

Xatırladaq ki, Prezident İlham Əliyev bu il aprelin 9-da ADA Universitetində çıxışında bildirmişdi ki, Azərbaycan artıq AİHM-in qərarlarını tanımayacaq. O, bunu Avropa Şurası Parlament Assambleyasından (AŞPA) Azərbaycanın nümayəndə heyətinin uzaqlaşdırılması ilə izah etmişdi.

AİHM işləri ilə məşğul olan vəkillərin sözlərinə görə, Azərbaycan hökuməti 2024-cü ilin mart ayından etibarən məhkəmənin qərarlarını icra etmir.