Azərbaycan Respublikasının Prezidenti İlham Əliyev noyabrın 7-də Pakistan İslam Respublikasının Baş naziri Məhəmməd Şahbaz Şəriflə məhdud tərkibdə görüş keçirib.

Prezident İlham Əliyev Pakistanın Baş nazirini qarşıladı, dövlət başçıları birgə xatirə fotosu çəkdirdilər.

Görüş zamanı Prezident İlham Əliyev sabah Bakıda keçiriləcək Vətən müharibəsində Qələbənin beşinci ildönümü münasibətilə hərbi paradda iştirakına görə Məhəmməd Şahbaz Şərifə təşəkkürünü bildirib. Dövlət başçısı bunu Azərbaycanla Pakistan arasındakı qardaşlıq münasibətlərinin təzahürü kimi qiymətləndirib.

Pakistanın Baş naziri isə paradda iştirakdan məmnunluğunu ifadə edib, Prezident İlham Əliyevi və Azərbaycan xalqını Zəfərin beşinci ildönümü münasibətilə təbrik edib. O, İslamabadda Azərbaycanın Qələbəsi şərəfinə üçrəngli bayrağımızın ucaldıldığını diqqətə çatdırıb.

Söhbət zamanı Azərbaycan və Pakistan arasında beynəlxalq təşkilatlarda qarşılıqlı dəstək, həmçinin iqtisadi-ticari əlaqələrin genişləndirilməsi məsələləri müzakirə olunub.

Prezident İlham Əliyev Azərbaycanın Pakistandan idxal olunan düyü və 15 adda məhsula güzəştli ticarət tarifləri tətbiq etməsini iki ölkə arasındakı iqtisadi əməkdaşlığın inkişafına töhfə kimi dəyərləndirib.

Görüşdə həmçinin hərbi və hərbi-texniki əməkdaşlıq, Hökumətlərarası Komissiyanın iclasının nəticələri və qarşılıqlı biznes səfərlərinin təşkili ilə bağlı məsələlər müzakirə olunub.

Tərəflər Pakistan şirkətlərinin işğaldan azad edilmiş ərazilərdə aparılan bərpa və quruculuq işlərində iştirakını da müzakirə ediblər.

Görüşün sonunda iki ölkə arasında dostluq və strateji tərəfdaşlıq münasibətlərinin daha da inkişaf etdiriləcəyi bildirilib.