USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Tofiq Yaqublu “Cəsarət” beynəlxalq mükafatına layiq görülüb
Həbsdə olan müxalif siyasətçi Tofiq Yaqublu beynəlxalq səviyyədə tanınan Dünya Azadlıq Konqresinin “Cəsarət” (“Courage Award”) mükafatına layiq görülüb.
Bu barədə hüquq müdafiəçisi Arif Yunus məlumat verib. Onun sözlərinə görə, mükafata namizədlərin irəli sürülməsi prosesi mart ayından davam edib və Sülh və Demokratiya İnstitutunun rəhbəri Leyla Yunus Tofiq Yaqublunun namizədliyini təqdim edib.
Arif Yunusun bildirdiyinə görə, bu il “Cəsarət” mükafatı üçün 60 ölkədən namizədlər irəli sürülüb. Mükafatın təqdimetmə mərasimi noyabrın 9-da Berlində baş tutub. Tədbirə Tofiq Yaqublunun qızı Nigar Həzi yalnız video vasitəsilə qoşula bilib. Mükafatı Yaqublunun adından Arif və Leyla Yunuslar qəbul ediblər.
Tofiq Yaqublu bu il martın 10-da Bakı Ağır Cinayətlər Məhkəməsinin hökmü ilə 9 il azadlıqdan məhrum edilib. O, dələduzluq və saxta sənəd hazırlama və istifadə etmə ittihamları ilə təqsirli bilinib.
Siyasətçi ittihamları qurama adlandıraraq hökmə etiraz olaraq aprelin 1-dən mayın 10-dək aclıq aksiyası keçirib.
Milli Şuranın və Müsavat Partiyasının üzvü olan Tofiq Yaqublu əvvəllər də 2013-cü ildə İsmayıllı etirazları zamanı həbs olunmuşdu. O zaman Şəki Ağır Cinayətlər Məhkəməsi tərəfindən 5 il müddətinə azadlıqdan məhrum edilmə cəzası almış, lakin 2016-cı ildə əfv sərəncamı ilə azadlığa buraxılmışdı.
Tofiq Yaqublunun həbsi daha əvvəl olduğu kimi, ABŞ, Avropa İttifaqı və beynəlxalq hüquq-müdafiə təşkilatları tərəfindən siyasi motivli hesab edilərək tənqid olunub.
