Bakıda naməlum şəxs tərəfindən hücuma məruz qaldığını bildirən azərbaycanlı jurnalist Aytən Məmmədova polisdə izahat verib, lakin tibbi ekspertizadan keçə bilməyib.

Bazar ertəsi günü jurnalistin təhdid olunması ilə əlaqədar cinayət işi açılıb.

Jurnalistin sözlərinə görə, hücum edən şəxs adını çəkmədiyi məhkəmə işinə görə onu hədələyib və yazmamasını tələb edib.

Aytən Məmmədova Azərbaycanda məhkəmə işlərini işıqlandıran jurnalistlərdən biridir.

“Bizi aparmağa gələndə səsini çıxarmağa heç kim qalmamışdı”

Qətlə yetirilən jurnalist Əvəz Şıxməmmədovun həmkarı: "Əvəz ailəsi və qohumları tərəfindən təzyiqlərə məruz qalırdı"
Aytən Məmmədova deyib ki, hücum edən ortayaşlı bir kişi ona arxadan yapışaraq, çənəsindən sıxıb və boğazına bıçaq dirəyərək "sən ağıllanmadın?" deyib və sonra jurnalistin qızının ünvanına təhdid xarakterli söz işlədib.

jurnalist, Aytən Məmmədova, boğazında xəsarət izləri

,
Sosial mediada yayılmış fotolarda jurnalistin boğazında xəsarət izləri görünür.

Hadisə mayın 8-də, axşam saatlarında, Aytən Məmmədova yaşadığı binanın liftinə daxil olarkən baş verib.

Məmmədova ötən axşam hadisəylə bağlı 102 - polisin qaynar xəttinə müraciət edib, izahat yazıb, tibbi ekspertizadan keçmək üçün göndəriş alıb.

Bazar ertəsi günü jurnalist Bakı şəhər Baş Polis idarəsinin əməliyyat işi üzrə rəis müavini Vüqar Ələkbərovla və digər səlahiyyətli şəxslərilə görüşüb və Binəqədi rayon polis idarəsində müstəntiqə izahat verib.

Lakin qeyri-iş günü olduğuna görə tibbi ekspertizadan keçə bilməyib, Aytən Məmmədova BBC News Azərbaycancaya müsahibəsində bildirib.

Aytən Məmmədova hücumu umumilikdə, peşə fəaliyyətilə əlaqəndirir.

Son vaxtlar jurnalist Tovuzun Dondar Quşçu kəndində 10 yaşlı Nərmin Quliyevanı öldürməkdə şübhəli bilinən İlkin Süleymanovun məhkəmə işini işıqlandırır.

"Sadəcə son vaxtlar sosial media hesabımdakı paylaşımların bir çoxu onunla bağlıdır və bunu da ən çox izləyən jurnalistəm. Bu, çox müəmmalı və çox səs-küylü hadisədir və bu işlə bağlı xeyli qaranlıq məqamlar ortaya çıxır. Məsələnin yayımlanmasında təvazökarlıqdan uzaq olsa da, öz rolum olduğunu vurğulamışam", Məmmədova deyir.

Nərmin Quliyeva 2019-cu il noyabrın 21-dən itkin düşüb, 45 gün sonra - yanvarın 6-da isə onun yandırılmış meyiti qonşusu İlkin Süleymanov tərəfindən evlərinin yaxınlığında tapılmışdı.

İlkin Süleymanov cinayətdə şübhəli bilinərək barəsində həbs qətimkan tədbiri seçilib. Baş Prokurorluq bəyan edib ki, İlkin Süleymanov "törətdiyi əməli tam etiraf edib".

Məhkəmədə isə 49 yaşlı İlkin Süleymanov "işgəncə gördüyünü və işgəncələrə görə cinayəti etiraf etdiyini söyləyib".

Baş Prokurorluq bundan əvvəl BBC-yə deyib ki, cinayətdə ittiham olunan İlkin Süleymanova qarşı işgəncə hallarından "söhbət belə gedə bilməz".

Daxili İşlər Nazirliyi bazar ertəsi günü günorta saatlarında bildirib ki, jurnalistə qarşı hərəkətlərdə Cinayət Məcəlləsinin "Öldürməklə və ya sağlamlığa ağır zərər vurmaqla hədələmə" (134-cü) maddəsinin tərkib əlamətləri olduğundan fakta görə Binəqədi RPİ İstintaq şöbəsində cinayət işi başlanıb.

Bu, Aytən Məmmədovanın başına gələn ilk hadisə deyil. Jurnalist təxminən 20 gün əvvəl ev telefonuna təhqiramiz zəng gəldiyini deyib. Məmmədova həmin telefon zəngi ilə hücum arasında hansısa əlaqə ola biləcəyini güman edir.

Jurnalistin hücuma məruz qalması sosial mediada müzakirələr yaradıb, siyasətçilər və jurnalistlər hadisəni pisləyiblər.

Medianın İnkişafı Agentliyi yaydığı açıqlamada bildirib ki, hadisə diqqətdə saxlanılır.

Azərbaycan Xalq Cəbhəsi Partiyasının sədri Əli Kərimli Aytən Məmmədovaya dəstək olmağa çağırış edib.

Aytən Məmmədovanın qalmaqallı məhkəmə işlərini işıqlandırdığını qeyd edən jurnalist Xədicə İsmayıl, Məmmədovanın işini "ictimaiyyətin həqiqəti bilməsi üçün yeganə şans kimi" qiymətləndirib.

Məsələ ilə bağlı jurnalistlər, hüquq müdafiəçiləri və fəallar Prezident İlham Əliyevə, daxili işlər naziri Vilayət Eyvazova, Dövlət Təhlükəsizlik Xidmətinin rəhbəri Əli Nağıyevə və Azərbaycan Respublikasının Baş prokuroru Kamran Əliyevə açıq müraciət imzalanıb.

"Biz, jurnalistlər və vətəndaş cəmiyyətinin nümayəndələri hər bir vətəndaşın təhlükəsizliyini təmin etməli olan ölkə başçısından, eləcə də hüquq-mühafizə orqanlarından tələb edirik ki, Aytən Məmmədovaya qarşı törədilən bu cinayət əməli düzgün araşdırılsın və işin arxasında dayanmış şəxslər tapılıb cəzalandırılsın", müraciətdə deyilir.

Sərhədsiz Reportyorlar (RSF), Human Rights Watch, Amnesty İnternational kimi beynəlxalq təşkilatlar ifadə azadlığının məhdudlaşdırılması, ölkədə azad və müstəqil medianın olmaması, tənqidi məqalələr yazan jurnalistlərin işinə maneələr törədilməsi və təhdid olunması kimi məsələlərə görə Azərbaycanı tənqid edir.

Azərbaycan hökuməti bu tənqidləri təkzib edir.