Belarus Prezidenti Aleksandr Lukaşenko Milli Birlik Günü ərəfəsində daha 25 nəfərin əfv edilməsi haqqında sərəncam imzalayıb. “Belta” dövlət xəbər agentliyinin məlumatına görə, sərbəst buraxılanlar arasında 12 qadın və 13 kişi var, onların 19-u 40 yaşdan aşağıdır və əksəriyyətinin uşaqları mövcuddur.

Azadlığa çıxanlar arasında “ekstremist” maddələrlə məhkum olunanlar da var. Belarusda siyasi fəallar adətən bu maddələrlə təqib olunur. Qeyd edək ki, sentyabrın 11-də də ölkədə 52 siyasi məhbus azad edilmişdi. Onların arasında “Azadlıq Radiosu”nun jurnalisti İhar Losik və prezidentliyə keçmiş namizəd Nikolay Statkeviç də olub. Statkeviç Litvaya getməkdən imtina edərək Belarusa qayıdıb.

71 yaşlı Lukaşenko sentyabrın 11-də paytaxt Minskdə ABŞ Prezidenti Donald Trampın xüsusi elçisi Con Koel ilə görüşdən sonra məhbusların azad edilməsini “humanitar jest” adlandırıb. Görüşdə tərəflər ticarət əlaqələrinin bərpası, eləcə də ABŞ səfirliyinin Minskdə yenidən açılması məsələsini müzakirə ediblər. ABŞ Minskdəki səfirliyini 2022-ci ilin fevralında bağlamışdı, bu isə Rusiya Prezidentinin Belarus ərazisindən Ukraynaya genişmiqyaslı hücumuna cavab olaraq baş vermişdi.

Con Koel bildirib ki, səfirliyin yenidən açılması üçün hələ dəqiq tarix yoxdur, lakin bu proses “çox yaxın gələcəkdə” baş verəcək. İyunda ABŞ xüsusi elçisinin səfəri zamanı da 14 siyasi məhbus azad olunmuşdu. Onların arasında mühacirətdə olan müxalifət lideri Svetlana Tixanovskayanın həyat yoldaşı Sergey Tixanovski də var.