“Meydan TV işi” üzrə həbs edilən jurnalist Fatimə Mövlamlı saxlanıldığı Bakı İstintaq Təcridxanasından məktub yazıb. O bildirib ki, istintaq mərhələsi yekunlaşıb və bu barədə onlara sentyabrın 4-də rəsmi elan olunub.

Mövlamlının sözlərinə görə, jurnalistlərə bir milyon manatdan çox qanunsuz gəlir əldə etmək və 79 mindən artıq vergi borcu ilə bağlı ittihamlar irəli sürülüb. Onlar Azərbaycan Respublikasının Cinayət Məcəlləsinin yeddi ayrı maddəsi ilə təqsirləndirilirlər.

“İttihamları oxuduqca özümü gülməkdən saxlaya bilmirdim. İş o qədər bərbad və reallıqdan uzaq qurulub ki, məndə hiddət belə doğurmur, sadəcə gülməli gəlir. Bu ittihamlar ağ yalandır. Bizim heç vaxt haqsız və cinayət yolu ilə əldə edilmiş qazancımız olmayıb. Həbsdə keçirdiyimiz hər gün müstəqil media uğrunda apardığımız mübarizənin əvəzidir. Biz jurnalistika fəaliyyətimizə görə həbsdəyik (Baxmayaraq ki, jurnalistika cinayət deyil)”, – deyə Mövlamlı yazıb.

O əlavə edib ki, on ay davam edən istintaq heç bir real nəticə ortaya qoya bilməyib:
“Bir bölük müstəntiq yığışıb adımıza milyonluq şər qoşmağa çalışdı, amma yapışmadı. Heç kim bizə cinayətkar gözü ilə baxmadı. Heç kim inanmadı.”

Mövlamlı təcridxanadakı şəxsi təcrübəsini də bölüşüb:
“Burada bir adət var, yeni tanış olan adamlar adlarından sonra hansı cinayətdə ittiham edildiklərini deyirlər. Mənim cavabım isə belə olur: ‘Mən jurnalistəm’ – vəssalam, daha heç bir sual qalmır. Çünki hamı bilir ki, Azərbaycanda jurnalist həbsə sadəcə öz işini dürüst yerinə yetirdiyi üçün də düşə bilər.”

Jurnalist məktubunun sonunda “Yaşasın müstəqil media! Yaşasın söz azadlığı!” deyə vurğulayıb.