III Respublika Platformasının qurucu heyət üzvü Ruslan İzzətli Kürdəxanı İstintaq Təcridxanasından oğluna məktub yazıb. Məktubda o, həm təhsil sisteminin, həm də məhkəmə sisteminin korrupsiya içində olduğunu qeyd edib.

15 sentyabrda yazdığı məktubda İzzətli oğluna müraciətlə bildirir ki, mahiyyətcə cəmiyyəti ayaqda saxlamalı olan iki əsas institut – məktəb və məhkəmə – Azərbaycanda öz funksiyasını itirib:

“Əziz oğlum, 15 sentyabr - təxminən eyni vaxtda ikimiz də mahiyyətcə toplumu, dövləti inkişaf etdirəcək, ayaqda tutacaq fərqli qurumlara gedəcəyik: sən məktəbə, mən isə məhkəməyə. Təəssüf ki, nə sənin getdiyin yerdə təhsil, nə də mənim getdiyim yerdə ədalət var”.

İzzətli qeyd edir ki, təhsil sistemi insanları sorğulamayan, itaətkar və rejimə bağlı yetişdirmək üçün qəsdən korlanıb, məhkəmələr isə “Femidanı zorlayaraq” siyasi qərarların icraçısına çevrilib.

O, oğluna müraciətində ədalət uğrunda mübarizədən çəkilmədiyini vurğulayıb:

“Mən bir tikə çörəklə ədalət arasındakı seçimimi sən doğulmamışdan etmişəm. Qoyma ki, korrupsiyanın bataqlığında boğulan təhsil sistemi səni özünə bənzətsin. Bunun üçün dərslərinə daha çox zaman ayır”.

Ruslan İzzətli məktubunun sonunda ümid ifadə edib ki, ölkədə sevgi və həqiqət qalib gələcək:

“İnan və əmin ol ki, bacaracağıq və bu ölkədə xoşbəxt yaşayacaqsan. Liderimiz Rəsulzadə deyirdi ki, elm olmadan heç bir nöqsanımız aradan qalxmayacaq. Unutmayın, sevgi və həqiqət qalib gələcək”.