Beynəlxalq insan hüquqları təşkilatı “Amnesty International” Azərbaycanda həbsdə olan elmi tədqiqatçılar Bəhruz Səmədov və İqbal Əbilovun azad edilməsi üçün kampaniyaya start verib. Təşkilat Prezident İlham Əliyevə məktublar yazılmasını çağırış edib və iştirakçılar üçün məktub nümunəsi hazırlayıb.

Məktub nümunəsində vurğulanır ki, Səmədov və Əbilov qondarma ittihamlarla və siyasi motivlərlə həbs olunublar. Təşkilat Əliyevdən onların dərhal və qeyd-şərtsiz azad edilməsini, həbs müddətində adekvat tibbi yardımın göstərilməsini və müstəqil müşahidəçilərin onlara baş çəkməsini tələb edir.

Bəhruz Səmədov 2024-cü il avqustun 21-də həbs olunub və 2025-ci il iyunun 23-də 15 il müddətinə azadlıqdan məhrum edilib. Onun üzərinə dövlətə xəyanət ittihamı irəli sürülüb, lakin Səmədov daim sülh tərəfdarı olduğunu və heç vaxt Dağlıq Qarabağın Ermənistan ərazisi olduğunu demədiyini bildirib.

İqbal Əbilov 2024-cü il iyulun 22-də Azərbaycanda saxlanılıb və 2025-ci il mayın 20-də 18 il həbs cəzası alıb. O, dövlətə xəyanət və milli nifrət yaratmaq cəhdində ittiham olunur, lakin Hüquqlarını Müdafiə Komitəsi Əbilovun heç bir siyasi fəaliyyətdə iştirak etmədiyini bildirir.