NİDA Vətəndaş Hərəkatının üzvü, İT mütəxəssisi İsmayıl Tağıyev iddia edir ki, Azərbaycanda “arzuolunmaz şəxs” kimi tanındığına görə iş tapmaqda ciddi maneələrlə üzləşir.

Tağıyev bildirib ki, bu ilin may ayından etibarən müxtəlif dövlət və dövlətə bağlı qurumlara iş üçün müraciət etsə də, seçim mərhələlərini uğurla keçməsinə baxmayaraq, son anda imtina cavabı alır. Onun sözlərinə görə, rədd cavabları əsasən anket mərhələsindən – şəxsi və ailə üzvləri haqqında məlumatların təqdim edilməsindən sonra gəlir.

“Rusiyanın ən böyük texnologiya şirkətlərindən birində çalışmışam, İT sahəsində üç ildən artıq təcrübəm var. Azərbaycana qayıtdıqdan sonra iş axtarmağa başladım. Müraciət etdiyim yerlərdə bütün mərhələləri keçdim. Lakin şəxsi və ailə məlumatlarımı təqdim etdikdən sonra ya cavab gəlməyib, ya da rədd olunmuşam”, – deyə Tağıyev bildirib.

O qeyd edib ki, sonuncu dəfə Rəqəmsal İnkişaf və Nəqliyyat Nazirliyinin nəzdində fəaliyyət göstərən süni intellekt laboratoriyasına dəvət olunub və bütün seçim mərhələlərini keçib. Lakin bir ay sonra ona bildirilib ki, şəxsi məlumatların yoxlanılması nəticəsində işə qəbuluna razılıq verilməyib. Rəsmi səbəb açıqlanmayıb.

İsmayıl Tağıyev yaranmış vəziyyəti siyasi səbəblərlə əlaqələndirir. Onun fikrincə, bu, həm özünün, həm də həyat yoldaşı – fəal Cəmilə Əlişovanın siyasi fəaliyyəti ilə bağlıdır:

“Həm mən, həm də həyat yoldaşım NİDA hərəkatının üzvüyük. Cəmilə bu il keçirilən bələdiyyə seçkilərində 23 saylı Nəsimi-Səbail dairəsindən namizəd olmuşdu. Düşünürəm ki, məhz buna görə şəxsi məlumatlarımız yoxlanılarkən ‘siyasi baxış’ kimi qiymətləndirilib və nəticədə mənim işə qəbulum əngəllənib. Azərbaycanda çox böyük təcrübəm ola-ola heç bir işə girə bilmirəm. Mənim də işləmək, yaşamaq hüququm var, amma bu hüquq faktiki olaraq əlimdən alınıb”.

Cəmilə Əlişova 2025-ci il yanvarın 29-da keçirilən bələdiyyə seçkilərində namizəd olub. O, seçkiöncəsi və seçkidən sonra bir sıra maneələrlə üzləşdiyini sosial şəbəkələrdə ictimailəşdirmişdi.

Məsələ ilə bağlı Rəqəmsal İnkişaf və Nəqliyyat Nazirliyindən şərh almaq mümkün olmayıb.