Yanvarın 3-də Yunanıstanın Kaliviya şəhərində bir villada narkotik məclisi təşkil etdiyi iddia edilən 44 yaşlı DJ İzzətxanım Cavadova barəsində həbs qətimkan tədbiri seçildiyi barədə yazmışdıq.

Yunan mətbuatı məhkəmənin detallarını barədə yazır.

Yunanıstanın ERT telekanalının məlumatına görə, DJ ittihamları rədd edib.

"Polisin basqın etdiyi partini mən təşkil etməmişəm və onlayn dəvətnamələr göndərməmişəm... Üstümdən də narkotik tapmayıblar".

O, partinin "sevgi və musiqiyə həsr olunmuş Texno Berlin kinki parti" olduğunu deyib.

Bildirib ki, onların narkotik istifadəçisi kimi təqdim edilməsi "LGBT icmasına qarşı hücum"dur.

Polisin verdiyi məlumata görə, şənliyin "təşkilatçısı Cavadovanın "yataq otağı"nda içərisində 45 bağlama kokain, ekstazi, kristal met, digər narkotik vasitələr və içərisində 43 min avrodan (45 min dollar) çox pul olan seyf tapılıb.

İzzətxanım Cavadova Azərbaycan Prezidenti İlham Əliyevin əmisi Cəlal Əliyevin qızıdır.

Prezident İlham Əliyev tez-tez ölkədə ailə dəyərlərindən danışır, Qərbi ailə dəyərlərindən uzaq, LGBT dəyərlərini yaymaqda günahlandırır.

Keçən ilin oktyabrın 20-də Xankəndidəki çıxışı zamanı da Qərbi ailə dəyərlərindən uzaq olmaqda ittiham edərək tənqid etmişdi:

"Bəzi Qərb ölkələrində ailə dəyərlərinin tamamilə eybəcər formaya düşməsi hər birimizdə haqlı olaraq ikrah hissi doğurur. Ona görə də, birinci növbədə ailə dəyərləri, ailə tərbiyəsi qorunmalıdır".