Cəlilabad rayonunda uzun illər sahibkarlıqla məşğul olan və ictimai fəallığı ilə tanınan Elşad Təhməzov 22 iyun 2025-ci ildə Bakıda saxlanılıb. O, Azərbaycan Cinayət Məcəlləsinin 234.1-1-ci maddəsi (narkotik vasitələrin qanunsuz dövriyyəsi) ilə ittiham olunur.

Sahibkarlıqdan siyasətə

Təhməzov 2016-cı ildə Cəlilabadda ona məxsus “Mal bazarı”nın qanunsuz yollarla əlindən alındığını bildirib. Həmin il əsassız həbs edilsə də, məhkəmədə bəraət alıb. Daha sonra Avropa İnsan Hüquqları Məhkəməsinə müraciət nəticəsində dövlətlə “dostcasına razılaşma” əldə olunub və ona kompensasiya ödənilib.

2020-ci il parlament seçkilərində deputatlığa namizəd olan Təhməzov hazırkı deputat Malik Həsənovla eyni dairədən mübarizə aparıb. O, rayonda baş verən haqsızlıqlara qarşı çıxaraq, uzun illərdən bəri bölgəyə faktiki rəhbərlik edən Kərəm Həsənovu açıq tənqid edib.

Qanun pozuntuları və məhkəmə qərarları

Elşad Təhməzovun həbsi zamanı bir sıra hüquq pozuntularına yol verildiyi qeyd olunur. Yasamal Rayon Məhkəməsi onun barəsində 4 aylıq həbs qətimkan tədbiri seçsə də, hakim Rauf Daşdəmirov iş üzrə xüsusi qərar qəbul edib.

Qərara əsasən, əməliyyatda iştirak edən Yasamal RPİ əməkdaşları – Elnur Kərimov, Müzəffər Əliyev, Rüstəm Abdullayev, həmçinin istintaqı aparan müstəntiq Orxan Süleymanlı barədə araşdırma aparılması üçün materiallar Daxili İşlər Nazirliyinə göndərilib.

Buna baxmayaraq, apelyasiya şikayəti təmin olunmayıb və Təhməzov həbsdə saxlanılır.

Yaxınlarının mövqeyi

Sahibkarın ailəsi və tərəfdarları hesab edirlər ki, onun həbsi siyasi sifarişdir və birbaşa Kərəm Həsənovun göstərişi ilə həyata keçirilib. Onlar Elşad Təhməzovun dərhal azad olunmasını tələb edirlər.