Türkiyənin paytaxtı Ankarada müxalif Cümhuriyyət Xalq Partiyasının (CHP) tərəfdarları kütləvi nümayiş keçiriblər. On minlərlə insan prezident Rəcəb Tayyib Ərdoğanın istefası tələbi ilə küçələrə çıxıb.

Etiraz aksiyası sentyabrın 14-də, bazar günü baş tutub. Reuters agentliyinin məlumatına görə, nümayiş iştirakçıları “Ərdoğan istefa!” şüarları səsləndiriblər.

Aksiya 15 sentyabrda keçiriləcək məhkəmə iclası ərəfəsində təşkil olunub. Həmin iclasda 2023-cü ilin noyabrında baş tutmuş CHP qurultayının nəticələrinin ləğvi məsələsinə baxılacaq. Həmin qurultayda partiyanın yeni lideri Özgür Özəl seçilmişdi. Əgər məhkəmə nəticələri etibarsız saysa, Özəl səlahiyyətlərindən uzaqlaşdırıla bilər. Bu isə 2028-ci ildə keçiriləcək prezident seçkilərinin vaxtına və Türkiyənin əsas müxalifət partiyasının gələcək siyasi xəttinə təsir göstərə bilər.

Mitinqdə çıxış edən CHP sədri Özgür Özəl baş verənləri siyasi sifariş adlandırıb:

“Bu iş siyasi xarakter daşıyır. İrəli sürülən ittihamlar böhtandır. Bizim silahdaşlarımız günahsızdır. Baş verənlər gələcək prezidentə, gələcək hökumətə qarşı çevrilişdir. Biz müqavimət göstərəcəyik.” – deyə Özəl bildirib.