Sentyabrın 16-da Sabunçu Rayon Məhkəməsində “Abzas Media”nın həbsdə olan əməkdaşları Elnarə Qasımova və Nərgiz Absalamovanın Bakı İstintaq Təcridxanasındakı saxlanma şəraiti ilə bağlı şikayətinə baxılıb. Hakim Vüsal Qurbanovun sədrliyi ilə keçirilən prosesdə təcridxananı təlim-tərbiyə şöbəsinin inspektoru Şamil Süleymanov təmsil edib.

Məhkəmədə Elnarə Qasımova vəkilinin yanında oturmaq üçün vəsatət versə də, hakim bunu təmin etməyib. Jurnalist bildirib ki, şüşə qəfəsdən məhkəmədə deyilənləri eşitmir və vəkili ilə məsləhətləşə bilmir.

Daha sonra jurnalistlər təcridxanadakı şəraitdən danışıblar. Onların sözlərinə görə, kameralarda məhbus sayı normadan artıqdır, otaqlar darısqal və havasızdır, su gündə cəmi iki dəfə – səhər və axşam bir saat verilir. Qasımova əlavə edib ki, təcridxana əməkdaşları məhbuslara qarşı zorakılığa yol verir, şikayət edən qadınları isə proseslərinin nəticələrinə təsir göstərəcəkləri ilə hədələyirlər. O, həmçinin rəhbərlik tərəfindən məhbus qadınların geyimlərinə dair yersiz atmacaların edildiyini deyib.

Nərgiz Absalamova isə aclıq aksiyası zamanı saxlanıldıqları kamerada gigiyenik şəraitin acınacaqlı olduğunu vurğulayıb: “Bir həftə otaqda ancaq tarakan təmizləmişəm. Məhbusların başına bit düşəndə isə həkimlər dərman əvəzinə alma sirkəsi məsləhət görürlər”.

Təcridxana nümayəndəsi Şamil Süleymanov isə iddiaları rədd edib. O bildirib ki, saxlanma şəraiti normaldır, jurnalistlər ikinəfərlik kameralarda qalır və onlara qarşı qeyri-insani rəftar edilməyib. Suyun da mütəmadi verildiyini qeyd edən Süleymanovun sözlərinə görə, təcridxanada səhər və axşam bir saat olmaqla su təminatı mövcuddur.

Məhkəmə jurnalistlərin bütün vəsatətlərini rədd edib.

Xatırladaq ki, 2023-cü ilin noyabrından “Abzas Media”nın direktoru Ülvi Həsənli, baş redaktor Sevinc Vaqifqızı, layihə koordinatoru Məhəmməd Kekalov, jurnalistlər Hafiz Babalı, Elnarə Qasımova, Nərgiz Absalamova və “Azadlıq Radiosu” əməkdaşı Fərid Mehralızadə həbs olunublar. Onlar qaçaqmalçılıq və maliyyə cinayətlərində ittiham edilirlər.

İyunun 20-də Bakı Ağır Cinayətlər Məhkəməsinin hökmü ilə Həsənli, Vaqifqızı, Babalı və Mehralızadə 9 il, Qasımova və Absalamova 8 il, Kekalov isə 7 il 6 ay azadlıqdan məhrum edilib. Hüquq müdafiəçiləri ittihamları əsassız sayır və jurnalistlərin həbsini onların peşə fəaliyyəti ilə əlaqələndirirlər.