Azərbaycan Baş Prokurorluğu “Azadlıq” qəzetinin baş redaktoru və “Azərbaycan Saatı” YouTube kanalının rəhbəri Qənimət Zahidə qarşı rəsmi ittihamlar irəli sürüb. Prokurorluğun açıqlamasına əsasən, jurnalist barəsində başlanmış cinayət işi üzrə ifadə verməsi üçün Bakıya çağırılıb. Məlumat İctimai Televiziyada səsləndirilib.

Prokurorluğun iddiasına görə, Qənimət Zahid dövlət çevrilişinə və hakimiyyətin zorla ələ keçirilməsinə çağırış edib. Bu ittiham Cinayət Məcəlləsinin 281-ci maddəsi ilə – “Dövlət əleyhinə yönələn açıq çağırışlar” – ilə əsaslandırılır. Maddəyə görə, belə əməllərə görə beş ilədək azadlıqdan məhrumetmə cəzası nəzərdə tutulur.

Qənimət Zahid ittihamlarla razılaşmadığını bildirib və prokurorluğun təqdim etdiyi sübutların ictimaiyyətə açıqlanmasını tələb edib:

“Bakıya gəlməzdən əvvəl tələb etmək haqqım var: dövlət çevrilişinə çağırış kimi şərh edilən çıxış hardadır? Mən onun məzmunu ilə tanış olmalıyam. Sizə inam yoxdur. Birdən gəldim, həmin sübutu tapa bilmədiz, cibimə narkotik atdız? Bu mümkündür. Ona görə də, öncə sübutu göstərin, sonra ifadə məsələsini müzakirə edə bilərik”.

Jurnalist həmçinin əlavə edib ki, prokurorluğun açıqladığı ittiham siyahısı tam deyil və sonradan başqa maddələrin də əlavə olunacağı istisna edilmir.

Rəsmi qurumlar hələlik əlavə açıqlama verməyiblər.