Sentyabrın 16-da Bakı Apellyasiya Məhkəməsində iqtisadçı alim, İstanbul Universitetinin doktorantı Fazil Qasımovun apellyasiya şikayəti üzrə məhkəmə prosesi davam etdirilib. Hakim Aqil Musayevin sədrliyi ilə keçirilən iclasda Qasımov çıxış etməzdən əvvəl vəkili ilə ünsiyyət üçün vaxt istəyib. Lakin bu tələb təmin olunmayıb.

Fazil Qasımov məhkəmədə bildirib ki, 2024-cü il yanvarın 24-də Bakı Ağır Cinayətlər Məhkəməsində keçirilən iclas zamanı Penitensiar Xidmət əməkdaşlarının sui-qəsdinə məruz qalıb. Onun sözlərinə görə, daha sonra da cəzaçəkmə müəssisəsində hücum təhlükəsi ilə hədələnib.

Qasımov həmçinin vurğulayıb ki, məhkəmə boyu verdiyi vəsatətlərin heç biri qəbul olunmayıb, hakimlərin etdiyi xəbərdarlıqlar isə qərəzli xarakter daşıyıb. O, məhkəmə heyətinə etirazını səsləndirib. Dövlət ittihamçısı Tural Qəhrəmanov etirazı əsassız adlandıraraq təmin edilməməsini tələb edib, hakim isə bu mövqeyi dəstəkləyib.

Prosesdə dövlət hesabına təyin olunmuş yeni vəkili Şamil Nəcəfov çıxış edərək həm istintaq, həm də məhkəmə mərhələsində müdafiə hüquqlarının pozulduğunu bildirib. O, apellyasiya şikayətinə baxılmasına xitam verilməsini və cinayət işinin birinci instansiyaya qaytarılmasını tələb etsə də, məhkəmə vəsatəti təmin etməyib.

Məhkəmə növbəti iclasda Fazil Qasımovun apellyasiya şikayətindəki dəlillərə münasibətini dinləyəcək. Prosesin davamı sentyabrın 29-na təyin edilib.

Xatırladaq ki, Fazil Qasımov 2023-cü il avqustun 8-də İstanbulda saxlanılaraq Azərbaycana gətirilib. O, iqtisadçı Qubad İbadoğluna qarşı açılmış cinayət işi çərçivəsində Cinayət Məcəlləsinin 204.3.1-ci maddəsi ilə (saxta pul və ya xarici valyuta ilə bağlı mütəşəkkil dəstə tərəfindən törədilən əməl) ittiham olunub.

Qasımov ifadəsində bildirib ki, istintaq zamanı zorakılığa məruz qalıb və xüsusi dərmanların təsiri altında İbadoğlunun əleyhinə saxta ifadəyə imza atmağa məcbur edilib. Daha sonra ifadəsindən imtina edən alim həbsinin siyasi səbəblərlə bağlı olduğunu vurğulayıb.

O, bu il martın 13-də Bakı Ağır Cinayətlər Məhkəməsinin hökmü ilə 9 il azadlıqdan məhrum edilib. Hüquq müdafiəçiləri Fazil Qasımovu siyasi məhbus kimi tanıyırlar.