Ölkə müxalifətinə türk şəhidlərini ziyarət etməyi qadağan etmək qanunsuzdurmu? Bəli, qanunsuzdur. Bu hadisə ölkədəki siyasi mühitin bir qədər də boğulması, qapadılmasıdırmı? Əlbəttə...

Bu, o deməkdir ki, artıq ölkədə müxalifət üçün anım mərasimləri, bayram tədbirləri, kütləvi ziyarətlər təşkil etmək qadağan olunur. Məsələnin bu hissəsi aydındır.
Lakin bütün bunlarla yanaşı 14 sentyabr tarixində baş vermiş rüsvayçılığın digər bir açması, izahı da var və bu izahın adı uzun illərdir sistemli şəkildə Əli Kərimlinin səsinin boğulması prosesinin davamıdır.

Bunu aydın görmək üçün, gəlin, bu prosesin qısa xronologiyasına nəzər yetirək və yaddaşımızı bir qədər təzələyək.
2005-ci il, Əli Kərimlinin beynəlxalq tribunalardan gələn səsi ölkədən çıxışı məhdudlaşdırılaraq qapadılır. O gündən bu günə qədər Əli Kərimli ölkə xaricinə səfərlər edə bilmir.

2009-cu il, Əli Kərimlinin ictimai televiziyadakı çıxışından sonra ona tamamilə efir qadağası tətbiq olunur və bundan sonra heç bir telekanaldan onun səsi eşidilmir.
2010-cu il, parlament seçkilərində şübhəsiz qələbəsi oğurlanır, nəticələr saxtalaşdırılaraq qazanılmış halal mandatdan məhrum edilir və bununla da onun parlament tribunasından danışmaq imkanı əlindən alınır.

2019-cu il, Məhsul stadionunda 10 minlərlə insanın iştirak etdiyi izdihamlı mitinqdən sonra ölkədə Sərbəst Toplaşmaq Azadlığı tamamilə qapadılır, mitinqlər, aksiyalar rəsmən qadağan edilir və bununla da Əli Kərimlinin mitinq tribunalarından da gələn səsi qapadılır.
2020-ci il, pandemiya zamanı canlı yayımda izləyici sayı 20 mini keçdikdən sonra evində, mobil telefonunda interneti kəsilir və bununla da Əli Kərimlinin sosial şəbəkələr üzərindən yayımlanan canlı müsahibələrinə son qoyulur.

2025-ci il, Əli Kərimlinin günahsız yerə həbs olunmuş siyasi məhbusların məhkəmələri önündə ard-arda verdiyi müsahibələrdən sonra, son zamanlar artıq buna da imkan verilmir və tez- tez belə müsahibələr zamanı polis zorakılığı ilə, məhkəmələrin qarşısına toplaşmış insanlar oradan uzaqlaşdırılır. Nəticədə artıq Əli bəyin bu imkanı da əlindən alınmış olur.

Nəhayət, 2025-ci ilin sentyabr ayı və məlum ziyarət tədbirinə qoyulan qadağa. Belə görünür ki, bundan sonra belə hallar tez-tez təkrarlanacaq və bu gedişlə Əli bəyin haqq səsi belə tədbirlərdən də eşidilməz olacaq.

Amma.....bu işin bir amması da var. Tarix, zaman, təcrübə göstərib ki, xalqın səsini kəsməyin, onu susdurmağa çalışmağın heç bir perspektivi yoxdur və heç zaman da olmayacaq. Bu gün kəsilməsinə çalışdıqları o səs Əli Kərimlinin şəxsi, özünün problemlərinə yönəlik bir səsi deyil. O səs, məzlumların, haqqı, hüququ tapdalanan, sosial məşəqqətlər altında əzilən yüz minlərlə, milyonlarla azərbaycanlının səsidir və o səs, onu kəsməyə çalışanların öz səslərinin kəsiləcəyi günə qədər müxtəlif üsullarla gələcək və nəinki yalnız Azərbaycanda, artıq Azərbaycan xalqının haqq səsini eşitməyə başlamış bütün dünyada eşidiləcək.