Avqustun 11-i səhər saatlarında şimal-qərb bölgəsində güclü küləyin əsməsi nəticəsində respublika əhəmiyyətli İsmayıllı-Qaraməryəm-Şəki-Oğuz avtomobil yolunun Oğuz rayonunun ərazisindən keçən 106-111-ci kilometrlik hissəsində 7 yerdə, Kərimli avtomobil yolunda isə 1 yerdə ağacların və iri budaqların qırılaraq yolun hərəkət hissəsinə aşması avtonəqliyyat vasitələrinin hərəkətini çətinləşdirib.
Bu barədə AZƏRTAC-a Azərbaycan Avtomobil Yolları Dövlət Agentliyinin İctimaiyyətlə əlaqələr şöbəsindən məlumat verilib.
Dərhal qeyd olunan ərazilərə agentliyin xüsusi alətlərlə təchiz olunmuş əməkdaşları cəlb olunub. Qısa müddət ərzində sözügedən avtomobil yollarının hərəkət hissəsi qırılmış ağac və budaqlardan təmizlənərək avtonəqliyyat vasitələrinin rahat və təhlükəsiz hərəkəti təmin olunub.