Rusiya Prezidenti Vladimir Putin Hindistanın Baş naziri Narendra Modinin dəvətini qəbul edərək bu ölkəyə səfər edəcək. Səfər, iki ölkə arasında ənənəvi illik ikitərəfli sammit çərçivəsində baş tutacaq.

Bu barədə Kremlin mətbuat xidməti məlumat yayıb. Telefon danışığı zamanı liderlər Rusiya-Hindistan münasibətlərinin xüsusi imtiyazlı strateji tərəfdaşlıq xarakterini bir daha vurğulayıblar. Bildirilib ki, bu münasibətlər xarici amillərdən asılı deyil və bütün sahələr üzrə ardıcıl şəkildə inkişaf edir.

Narendra Modi, həmçinin, mayın 9-da Moskvada keçiriləcək bayram tədbirində Hindistanın rəsmi nümayəndəsinin iştirak edəcəyini təsdiqləyib.

Putin və Modinin qarşıdakı sammitdə regional və qlobal məsələlərlə yanaşı, iqtisadi, müdafiə və enerji sahəsində əməkdaşlığın perspektivlərini də müzakirə etmələri gözlənilir.