Azərbaycan Xalq Cəbhəsi Partiyasının (AXCP) üzvü Asam Əlinin inzibati qaydada 30 sutka müddətinə həbs olunduğu bildirilir. Bu barədə məlumatı partiyanın mətbuat xidməti yayıb.

Partiyadan verilən açıqlamaya görə, Asam Əli ilə son dörd gündür əlaqə saxlamaq mümkün olmayıb. Yalnız mayın 8-də onun həbs edildiyi barədə xəbər əldə olunub. Həbsin səbəbi və hüquqi əsasları hələlik ictimaiyyətə açıqlanmayıb, məsələ ilə bağlı rəsmi qurumlardan da məlumat almaq mümkün olmayıb.

AXCP sədri Əli Kərimli bildirib ki, Asam Əli sosial mediada fəal biri olmayıb, lakin son vaxtlar AXCP rəhbərliyinə göstərdiyi dəstəyə görə hədəf alınıb: “Məsələ belədir ki, öz maşını ilə, ictimai əsaslarla mənə sürücülük edən AXCP fəalı Zaur Rzalı həbs edildikdən sonra Asam bəy məni bir neçə dəfə tədbirlərə aparmışdı. Görünür, bununla da rejimin qara siyahısına düşüb. Son iki ayda məni müşayiət edən altı AXCP fəalı artıq həbs olunub”.

Qeyd edək ki, Zaur Rzalı aprelin 1-də Nərimanov Rayon Məhkəməsinin qərarı ilə 30 sutka müddətinə inzibati həbsə məhkum edilmişdi. Ona qarşı İnzibati Xətalar Məcəlləsinin 510-cu (xırda xuliqanlıq) və 535.1-ci (polis əməkdaşının qanuni tələbinə tabe olmamaq) maddələri ilə ittiham irəli sürülüb. AXCP onun da siyasi sifarişlə şərlənərək həbs edildiyini bildirib.

Xatırlatma üçün bildirək ki, hazırda AXCP-nin 15-ə yaxın üzvü uzunmüddətli həbsdədir və partiya bu həbslərin siyasi motivlərlə həyata keçirildiyini bildirir. Azərbaycan rəsmiləri isə ölkədə siyasi məhbusların olduğunu inkar edir və həbslərin qanunvericiliyə uyğun şəkildə aparıldığını bəyan edirlər.