Birləşmiş Millətlər Təşkilatının Əhali Fondu (UNFPA) Azərbaycandakı Nümayəndəliyinin fəaliyyəti 2025-ci ilin may ayında rəsmi olaraq başa çatıb. Qurumdan verilən açıqlamaya əsasən, bu qərar fondda aparılan struktur dəyişiklikləri və əməkdaşlıq formatına yenidən baxılması ilə əlaqədardır.

Məlumatda qeyd olunub ki, UNFPA son 30 il ərzində Azərbaycanda ana və uşaq sağlamlığının yaxşılaşdırılması, gender əsaslı zorakılığın qarşısının alınması və əhali siyasəti sahəsində hökumətə və digər tərəfdaşlara mühüm dəstək verib.

Təşkilat əlavə edib ki, UNFPA ilə Azərbaycan arasındakı əməkdaşlıq tamamilə dayandırılmır – əlaqələr Şərqi Avropa və Mərkəzi Asiya üzrə Regional Ofis və baş qərargah vasitəsilə davam etdiriləcək.

Qeyd edək ki, bu ayın əvvəlində – mayın 2-də – BMT-nin İnkişaf Proqramının (UNDP) da Azərbaycandakı nümayəndəliyi fəaliyyətini dayandırmışdı. Hökumətyönlü media qurumları daha əvvəl xəbər vermişdi ki, Azərbaycanda fəaliyyət göstərən bir sıra beynəlxalq təşkilatlara – o cümlədən UNDP, UNHCR, UNICEF və Beynəlxalq Qızıl Xaç Komitəsinə – əməkdaşlıq formatına yenidən baxılması ilə bağlı xəbərdarlıq edilib.

Azərbaycan tərəfi bu qərarları ölkənin beynəlxalq qurumlarla münasibətlərinin yeni mərhələyə qədəm qoyması və resursların daha səmərəli istifadəsi məqsədilə verdiyini bildirib. Xarici işlər naziri Ceyhun Bayramovun da qeyd etdiyi kimi, Bakı BMT ilə əməkdaşlığını yeni dövrün reallıqlarına uyğun şəkildə yenidən qurmağı planlaşdırır.

Azərbaycan 1992-ci ilin martında BMT-yə üzv qəbul olunub və bu illər ərzində təşkilatla müxtəlif sahələrdə sıx əməkdaşlıq həyata keçirib.