USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
AXCP sədrinin daha bir mühafizəçisi Kənan İsmayıl həbs edilib
Müxalifətdə olan Azərbaycan Xalq Cəbhəsi Partiyasının (AXCP) sədrinin ictimai əsaslarla fəaliyyət göstərən daha bir mühafizəçisi – Kənan İsmayıl – inzibati qaydada 30 sutka müddətinə həbs edilib. Bu barədə məlumat partiya tərəfindən mayın 6-da yayılıb.
AXCP bildirir ki, Kənan İsmayıl “xırda xuliqanlıq” ittihamı ilə cəzalandırılıb. Lakin hadisənin təfərrüatları açıqlanmayıb. Partiya mayın 5-i günorta saatlarından etibarən İsmayılla əlaqənin kəsildiyini və onun saxlanıldığı ehtimalını irəli sürmüşdü.
Partiya rəhbərliyi qeyd edir ki, bu, sədr Əli Kərimlinin mühafizə xidmətində iştirak edən şəxslərdən dördüncüsünün həbsi olub. Bundan əvvəl, aprelin 9-da, mühafizəçi Elnur Quliyev də 30 sutkalıq inzibati həbsə məruz qalmışdı.
Hazırda AXCP-nin 15-ə yaxın üzvü uzunmüddətli həbsdədir. Onlar müxtəlif ittihamlarla üzləşsələr də, partiya bu həbslərin siyasi motivli olduğunu iddia edir. Mühafizəçilərdən Niyaməddin Əhmədov terroru maliyyələşdirmə və digər ittihamlarla 13 il müddətinə azadlıqdan məhrum edilib. Digər mühafizəçi Kənan Basqal isə bir şəxsi bıçaqlama ittihamı ilə həbs olunub. Hər iki şəxs ittihamları qəbul etmir.
Rəsmi qurumlar, o cümlədən Daxili İşlər Nazirliyi hələlik məsələ ilə bağlı heç bir açıqlama verməyib. Yerli hüquq müdafiə təşkilatlarının məlumatına görə, hazırda Azərbaycanda 350-dən çox siyasi məhbus var. Lakin hökumət rəsmiləri bu iddiaları qəbul etmir və həmin şəxslərin konkret qanun pozuntularına görə məsuliyyətə cəlb olunduğunu bildirirlər.
Hadisə ilə bağlı əlavə məlumat verildikcə xəbər yenilənəcək.
