Milli Məclisin deputatı Azər Badamov Rusiyada saxlanılıb. Hadisə onun Həştərxan vilayətinə səfəri çərçivəsində baş verib. Deputat ötən gün Moskvadakı hava limanında saxlanılıb və ona Rusiya ərazisinə giriş qadağası qoyulub.

Hadisənin səbəbləri rəsmi şəkildə açıqlanmasa da, ehtimallara görə bu addım Badamovun rusiyalı həmkarı, Dövlət Dumasının deputatı Nikolay Valuyevin azərbaycanlılara qarşı səsləndirdiyi təhqiramiz fikirlərə verdiyi sərt cavabla bağlıdır.

Rusiyanın TASS agentliyinə danışan diplomatik mənbə də bu ehtimalı istisna etməyib. Mənbə qeyd edib ki, Badamova qarşı görülən tədbirlər şəxsi xarakter daşıyır və Rusiya ilə Azərbaycan arasındakı strateji tərəfdaşlıq münasibətlərinə təsir göstərmir:
“Rusiya dost ölkələrlə münasibətlərdə stop-list praktikasını dəstəkləmir. Xatırlatmaq lazımdır ki, bundan əvvəl bəzi rusiyalı deputatların Azərbaycana girişinə də qadağa qoyulmuşdu. Bu sırada sonuncu hal Nikolay Valuyevlə bağlı idi”.

Xatırladaq ki, “Vahid Rusiya” partiyasından olan Nikolay Valuyev azərbaycanlıları “şobla” (banda) adlandırmışdı. Buna cavab olaraq, deputat Azər Badamov Valuyevi sərt tənqid etmişdi:

“Bu təyin ilk növbədə Valuyevin özünü xarakterizə edir. Üstəlik, ‘banda’nın orta nümayəndəsini bədii şəkildə təsvir etməyə çalışsaq, Nikolay Valuyevin portreti bunun üçün ən uyğun olardı. Bu məxluqun antropoloji tipinə baxmaq kifayətdir ki, o, təkamülün çıxılmaz qolunun nadir eksponatıdır, inkişafında Neandertal və Homo sapiens arasında bir yerdə ilişib qalıb”.

Baş vermiş hadisə Azərbaycan-Rusiya münasibətlərində yeni gərginlik dalğası yaradıb.